बसन्त बस्नेत बने अनलाइनखबरडटकमको सम्पादक

अनलाइनखबरडटकमको सम्पादकमा बसन्त बस्नेत नियुक्त भएका छन् । अनलाइनखबर नेपाल प्रा.लि. सञ्चालक समिति बैठकले बस्नेतलाई सम्पादकमा नियुक्त गर्ने निर्णय गरेको हो ।

सम्पादक बस्नेतलाई स्वागत गर्दै अनलाइनखबरडटकमका प्रधानसम्पादक शिव गाउँलेले एकजना अनुभवी र सक्षम युवा सम्पादकलाई अनलाइनखबरको समाचार कक्षमा स्वागत गर्न पाउँदा आफूलाई खुसी लागेको बताए । ‘विश्वसनीय, सन्तुलित र न्यायपूर्ण पत्रकारिताको हाम्रो यात्रा अब झन् प्रभावकारी रूपमा अघि बढ्छ’ प्रधानसम्पादक गाउँलेले भने, ‘बेथिति, भेदभाव, अन्याय र विभेद माथि प्रश्न गर्ने काम हामी झन् सशक्त रूपमा गर्नेछौं ।’

कार्यक्रममा अध्यक्ष धर्मराज भुसाल, कार्यकारी निर्देशक सुरेश भुसालसहित सम्पादकीय सहकर्मीहरूको उपस्थिति थियो ।
१२ वर्षदेखि पत्रकारितामा सक्रिय बस्नेतले यसअघि कान्तिपुर दैनिकमा राजनीतिक संवाददाता, नागरिक दैनिकमा रिपोर्टिङ तथा सम्पादनको कार्य गरिसकेका छन् । यसैगरी उनले अन्नपूर्ण टुडेमा सम्पादक र अन्नपूर्ण पोस्ट दैनिकमा समाचार सम्पादक, नेपाल म्यागेजिनमा सम्पादक र शिलापत्रडटकममा प्रधान सम्पादकको जिम्मेवारी सम्हालिसकेका छन् ।