किन पैसामुखी भएकी छिन् पूजा ?
नेपाली चलचित्रका निर्मातामा एउटा भ्रम सृजना भएको छ, ‘नायिका पूजा शर्मालाई आफ्नो चलचित्रमा लिइयो भने चलचित्र चल्छ’ । के साच्चिकै पूजालाई चलचित्रमा लियो भने चलचित्र हिट हुन्छ त ?
पछिल्लो समय रिलिज भएका चलचित्रको व्यापार हेर्ने हो भने त्यो गलत सावित हुन्छ । पूजा अभिनित चलचित्र ‘पोइ पर्यो काले’ बक्स अफिसमा नमज्जाले चिप्लिएको थियो । ‘रामकहानी’ पनि ठिक-ठाक मात्रै चलेको चलचित्र हो ।
तर, पूजालाई नम्बर १ नायिका भएको स्वघोषणा गर्दै निर्माताहरु लाखैँ रुपैया पूजामाथि खन्याइरहेका छन् । पूजाले चलचित्र ‘पोइ पर्यो काले’बाट नै २० लाख पारिश्रमिक लिएको ‘हुइया’ पिटिन । तर, चलचित्र रिलिज भएपछि निर्माताको हातमा पूजालाई दिएको पारिश्रमिक पनि फिर्ता आएन ।
पूजाले ‘सम्झना-विर्सना’ नामक चलचित्रबाट पनि राम्रै पारिश्रमिक लिएको गफ दिएकी छिन् । उक्त चलचित्रको छायांकन सकिसकेको छ । यता पूजाले अहिले अर्को चलचित्र ‘मन परेसी’को छायांकन सुरु गरेकी छिन् ।
‘मन परेसी’ पूजाले पैसाको लागि मात्रै गरेकी हुन् । यस चलचित्रबाट भने उनले राम्रै पैसा लिएकी छिन् । ‘टुरिष्ट प्रोडुसर’ भएका कारण उनले राम्रो पैसा झार्न सफल भएकी हुन् ।
किन पैसाको पछि छिन् पूजा ?
पूजालाई थाहा छ, अब चलचित्र क्षेत्रमा आफ्नो समय धेरै छैन् । पैसा कमाउने मैका यही हो भन्ने पत्तो उनले पाइसकेकी छिन् । त्यसैले उनी धमाधम पैसाको लागि चलचित्रमा काम गरिरहेकी छिन् ।
सुनिए अनुसार अर्को वर्ष पूजाले बिबाह गर्दैछिन् । बिबाह पछि उनले चलचित्र क्षेत्रमा काम नगर्ने घोषणा नै गरेकी छिन् । त्यसैले भविष्यको लागि पनि उनले पैसा जोह गरिरहेकी छिन् ।
पूजाले हालै नयाँ घरको जग पनि हालेकी छिन् । त्यो घर निर्माण पूरा गर्न पनि उनले धमाधम चलचित्रमा काम गरिरहेकी छिन् ।
पूजालाई फ्यान किनेको आरोप
पूजालाई आरोप छ, ‘फ्यान किनेकी छिन्’ । उनले केही समुहलाई आफ्नो गीत र अन्तरवर्तामा प्रतिकृया दिन खडा गरेकी छिन् । जसले गर्दा उनको स्टरडम देखियोस् । यस विषयमा पूजाको आलोचना पनि भइरहेको हुन्छ ।
तपाईले पूजाको बारेमा केही नराम्रो लेख्नुस्, तपाईलाई गाली गर्नेहरुको लर्को लाग्छ । ५० जना भन्दा बढि ‘फेसबुक युजर’ तपाईलाई तथानाम गाली गर्न सुरु गर्छन् । ती पूजाले किनेका फ्यान हुन् भन्ने आरोप पूजालाई छ ।
के टिक्ला त स्टरडम ?
पूजाको आश निर्देशक सुदर्शन थापा मात्र हुन् । सुदर्शन थापासँगको सहकार्यमा पूजालाई केही आश लागेको हुन सक्छ । सुदर्शनको निर्देशनमा बनेको चलचित्र ‘म यस्तो गीत गाउँछु २’ र ‘सम्हालिन्छ कहिले मन’बाट पूजालाई स्टारडम बचाउने आश होला ।
तर, सम्झना विर्सना, मन परेसी जस्ता पैसाको लागि काम गरेका चलचित्रले भने पूजालाई ब्याक फायर गर्नेछ । यस्ता कुरामा पूजाले सोच्ने बेला भइसकेको छ ।