प्रियंका र दिलिप नाचेको ‘लक्का जवान’को दोश्रो गीत सार्वजनिक !

चलचित्र ‘लक्का जवान’को दोस्रो गीत सार्वजनिक भएको छ । बुधबार राजधानीमा एक कार्यक्रमको आयोजना गर्दै चलचित्रमा समावेश ‘मुसुक्कै हाँसन माया’ बोलको गीत सार्वजनिक गरिएको हो । गीतमा बाबुल गिरीको शब्द तथा संगीत रहेको छ । गीतमा बाबुल र जुना रिजाल काफ्लेको स्‍वर सुन्न सकिन्छ । गीतको भिडियोमा चलचित्रका मुख्य कलाकार दिलिप रायमाझी, प्रियंका कार्की, सलोन बस्नेत र वर्षा सिवाकोटीलाई फिचर गरिएको छ । भिडियोमा कविराज गहतराजको नृत्य निर्देशन रहेको छ ।

चैत २१ गते रिलिज हुने यस चलचित्रलाई शिवहरी पौडेलले निर्देशन गरेका हुन् । चलचित्रको कथा, पटकथा तथा संवाद पनि शिवहरी आफैँले तयार गरेका हुन् । चलचित्रमा किरण केसी, राजाराम पौडेल, शिवहरि पौडेलको साथमा सुशिल पोखरेल, मनिषा श्रेष्ठ लगायतको अभिनय रहेको छ ।

किरण केसीको प्रस्तुतीमा तयार भएको यस चलचित्रमा अनसुया श्रेष्ठको लगानी रहेको चलचित्रमा किरण केसी, शिवहरि पौडेल र दीलिप रायमाझी कार्यकारी निर्माताको रुपमा छ । पुरुषोत्तम प्रधानले खिचेको चलचित्रलाई मित्र डि गुरुङले सम्पादन गरेका छन् ।