खुशीको खबर ! चीनबाट फर्किएका सबै सुरक्षित, क्वारेन्टाइनबाट घर फर्किँदै
चीनको कोरोना प्रभावित क्षेत्रबाट उद्धार गरी भक्तपुरको खरिपाटीस्थित क्वारेन्टाइनमा राखिएकाहरुलाई आज सोमबार घर पठाइँदैछ । चीनको वुहानबाट ल्याइएका १ सय ७५ जनालाई क्वारेन्टाइनबाट सकुशल घर पठाउन लागिएको हो । उनीहरु सबै कोरोना भाइरसबाट संक्रमित नभएको चिकित्सकहरुले पुष्टि गरेका छन् ।
साँझ ४ बजेतिर उनीहरुलाई घर पठाइने चिकित्सक टोलीले जनाएको छ । केही बेरमा स्वास्थ्यमन्त्री भानुभक्त ढकाल खरिपाटी पुगेर सबैलाई बिदाइ गर्ने कार्यक्रम छ । चीनको वुहानमा रहेका नेपाली विद्यार्थीलाई चिकित्सकको टोलीले दुई साताअघि उद्धार गरी ल्याएको थियो । विद्यार्थीसँगै चिकित्सक टोली पनि क्वारेन्टाइनमै बसेका थिए ।