‘बाघी ३’को ५ दिने कमाई ७६ करोड ९४ लाख

टाइगर श्राफ स्टारर चलचित्र ‘बाघी ३’ले ५ दिनमा ७६ करोड ९४ लाख कमाएको छ । होली बिदाको फाइदा उठाउँदै यस चलचित्रले उच्च कमाई गर्न सफल भएको छ ।

रिलिजको पहिलो दिन शुक्रबार १७ करोड ५० लाखको व्यापार गरेको यस चलचित्रले शनिबार १६ करोड ३ लाख कमाएको थियो । आइतबार भने चलचित्रको व्यापार २० करोड ३० लाखको पुगेको थियो । सोमबार ९ करोड ६ लाख कमाएको यस चलचित्रले मंगलबार १४ करोड ५ लाख कमाउन सफल रह्यो ।

बाघी ३ विश्वभर ५५ सय हलमा रिलिज भएको थियो । रिलिजको समयमा कोरोनाले चलचित्रलाई असर गर्ने हो कि भन्ने त्रास थियो । तर, चलचित्रले कोरोनाको त्रासमा पनि उच्च व्यापार गर्न सफल भएको छ ।

आम्हेद खान निर्देशित यस चलचित्रलाई समीक्षात्मक रुपमा भने राम्रो प्रतिकृया मिलेन । चलचित्रमा टाइगरको एक्सनलाई भने दर्शकले रुचाएका छन् । चलचित्रमा टाइगरसँगै श्रद्धा कपुर, रितेश देशमुख लगायतको मुख्य भूमिका रहेको छ । चलचित्रलाई सजिद नाडियाडवालाले निर्माण गरेका हुन् ।