दुई कालाकारको सहयोग: पलले खुवाए खाना, आँचलले दिइन् राहत

हालै बैवाहिक जीवनमा बाँधिएकी नायिका आँचल शर्मा निकै विवादित बनेकी थिइन् । विवाहमा लगाएको महंगो लेहेङ्गा र गर-गहनाका कारण उनी धेरै विवादित बनेकी थिइन् ।

उक्त खर्च पछि फाल्तु खर्च नगरेर समाज सेवाको काम गर्न उनलाई धेरैले सुझाब दिइरहेका थिए । अहिले आँचलले समाज सेवाको लागि पनि हात अगाडि बढाएकी छिन् ।

आँचल र उनको श्रीमान उदीप श्रेष्ठले एक सय विपन्न परिवारलाई सहयोग गरेका छन् । लकडाउनका कारण समस्यामा परेका परिवारलाई आँचल र उदीपले राहत वितरण गरेका हुन् ।

आँचलले क्षेत्रपाटी क्षेत्रमा बसोबास गर्ने मजदुर परिवारलाई सहयोग गरेको बताइन् । आपतको समयमा सकेको सहयोग गर्नुपर्ने बताउँदै आफ्नो तर्फबाट सक्दो सहयोग गरेको उनको भनाई छ ।

त्यस्तै, नायक पल शाहले सोमबार साँखुमा रहेको एक आश्रमा पुगेर त्यहाँ रहेका अनाथलाई खाना खुवाएका छन् । द्वन्द्व पिडित तथा अपाङ्ग सेवामा रहेका ५५ अनाथलाई उनले खाना खुवाएका हुन् ।

पलले भने, ‘त्यहाँ २ वर्षदेखि १८ वर्षसम्मका बालबालिकाहरु हुनुहुँदो रहेछ । उहाँहरुलाई हमीले खाना खुवायौँ । साथै केही चामल र तरकारीहरु पनि सहयोग गरेका छौँ ।’