अफ्रिकामा मात्रै झण्डै २ लाखको ज्यान जानसक्ने चेतावनी !

विश्व स्वास्थ्य संगठन (डब्लूएचओ) ले कोरोना भाइरसको महामारी यदि अफ्रिकामा रोक्न सकिएन भने झण्डै २ लाखको ज्यान जान सक्ने चेतावनी दिएको छ । डब्लूएचओको एक अध्ययनले अफ्रिकी मुलुकहश्रमा कोरोना रोकथामका उपाय फेल भएमा यस महामारीको पहिलो वर्षमा नै अफ्रिकामा १ लाख ९० हजारभन्दा बढीको मृत्यु हुने चेतावनी दिइएको हो ।

अफ्रिकाका ४७ देशहरुको अवस्था विश्लेषण तथा प्रेडिक्सन मोडलको यो चेतावनी दिइएको बिबिसीले जनाएको छ । डब्लूएचओको अध्ययनअनुसार यदि अल्जेरिया, दक्षिण अफ्रिका र क्यामरुनमा रोकथामका उपायबारे ध्यान दिइँदैन भने त्यहाँको अवस्था थप भयावह हुनेछ । जसअनुसार स्वास्थ्य सेवाका लागि अबका दिन थप चुनौतीपूर्ण हुनेछन् र भारी संख्यामा मानिसहरु अस्पताल पुग्ने हुँदा धान्न सकिने छैन ।

अध्ययनमा अस्पतालहरुले आफ्नो क्षमता बढाउनुपर्ने सुझाव समेत दिइएको छ । मार्च २०२० मा गरिएको एक अध्ययनमा पत्ता लागेअनुसार अफ्रिकी क्षेत्रमा औसतमा १० लाख व्यक्तिमा ९ जनाका लागि मात्रै आइसीयू वार्ड उपलब्ध छन् । जबकि संक्रमण व्यापक बन्दै गएमा त्यहाँको स्वास्थ्य प्रणालीले नै धान्न सक्ने छैन ।