यमको निर्देशनमा बन्ने चलचित्रमा स्वेता

अभिनेत्री स्वेता खड्काले नयाँ चलचित्रमा काम गर्ने भएकी छिन् । कान्छी रिलिज भएको २ वर्ष पछि स्वेताले नयाँ चलचित्रमा काम गर्न लागेकी हुन् ।

‘हुर्रे’, ‘राज्जा रानी’, ‘मेरी मामु’लगायत चलचित्र निर्देशन गरेका निर्देशक यम थापाको निर्देशनमा बन्न लागेको चलचित्रका लागि स्वेता पक्का भएकी हुन् ।

स्वेताले आफ्नो भूमिकाको विषयमा जानकारी दिएकी छैनन् । स्वेताले चलचित्रमा आमाको भूमिका निर्वाह गर्ने बुझिएको छ । स्वेता आफ्नो भूमिकालाई लिएर उत्साहित छिन् ।

चलचित्रको लागि नाम र अन्य कलाकार भने पक्का भएका छैनन् । केही समयमा नै चलचित्रको नाम र कलाकारको नाम सार्वजनिक गर्ने निर्माण पक्षको लक्ष्य रहेको छ । कोरोनाको अवस्था सामान्य हुनसाथ चलचित्रको छायांकन सुरु हुनेछ ।

पटकथा लेखकको रूपमा आफ्नो गतिलो परिचय बनाएका यमले निर्देशकको रूपमा भने आफूलाई स्थापित गर्न सकेका छैनन् । उनी यस चलचित्रको लागि भने विशेष मिहिनेत गरिरहेको बताएका छन् ।