चलचित्र क्षेत्रमा सरकारले सहयोग नगरेको भुवन केसीको आरोप
चलचित्र विकास बोर्डका अध्यक्ष भुवन केसीले फिल्म क्षेत्रको विकासका लागि सरकारले सहयोग नगरेको आरोप लगाएका छन् ।
प्रदर्शकहरुको छाता संस्था नेपाल चलचित्र संघले आयोजना गरेको आफ्नो स्वागतमा गरेको कार्यक्रममा बोल्दै केसीले भने, ‘राज्यले जति सपोर्ट दिनुपर्ने थियो, त्यो पाइराखेका छैनौं । म तपाईंहरुकै लागि बोर्डमा आएको हुँ ।’
चलचित्र उद्योगलाई संसारभर फैलाउने र सम्पूर्ण समस्या समाधान गर्ने प्रतिबद्धता केसीले गरे । उनले अझै पनि फिल्म हल आउनुपर्ने भन्दै आफूले सिनेमा घरलाई मन्दिर भन्ने गरेको बताएका छन् ।
‘मन्दिर नै छैन भने कहाँ पूजा गर्ने ?’ उनले प्रश्न गरे ।
कार्यक्रममा संघका पूर्वअध्यक्षहरु नकिम उद्दिन र प्रदीपकुमार उदयले फिल्मको विकासको लागि सरकार गम्भीर नभएको बताएका छन् । उनले अध्यक्ष केसीसामु फिल्म क्षेत्रको समस्या र माग प्रस्तुत गरेका छन्।