मोरङमा हत्या गरेर फरार भएका पुरुस ५ वर्ष पछि पक्राउ

काठमाडौँ – मोरङ जहदा गाउँपालिका–१ मा महिलाको हत्या गरेर फरार बनेका एकजना पुरुष ५ वर्षपछि पक्राउ परेका हुन् । इलाका प्रहरी कार्यालय बुधनगरबाट खटिएको सइ उज्वल शाक्य नेतृत्वको टोलीले जहदा–१ का ४५ वर्षीय शम्भु साहलाई आइतबार साँझ पक्राउ गरेको छ ।

जग्गाको सिमाना विवादमा साहले २०७६ साल जेठ १० गते जहदा–१ की ६० वर्षीय नान्कीदेवी ठाकुरको हत्या गरेको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताएक छन् । दाउराले प्रहार गरेर महिलाको हत्या गरेपछि उनी फरार बनेको बस्नेतको भनाइ रहेको छ ।
उनका अनुसार फरार भएको लामो समयपछि हत्याका आरोपीलाई जहदा–१ तिल्हरियाबाट पक्राउ गर्न प्रहरी सफल भएको छ । साहविरुद्ध कर्तव्य ज्यान मुद्दा चलाउने प्रहरीको तयारी छ । घटनाका सम्बन्धमा इलाका प्रहरी कार्यालय रानीका इन्सपेक्टर प्रकाश थापा नेतृत्वको टोलीले थप अनुसन्धान अघि बढाएको हो ।