दुई लाखभन्दा बढी तलबमा इजरायलमा ८०० कामदार माग, यस्तो हुनुपर्ने छ योग्यता

काठमाडौं– इजरायलका दीर्घकालीन स्याहार केन्द्रमा काम गर्न सहायक कामदार (केयरगिभर) लागि नेपाली कामदारको आवेदन आह्वान गरिएको छ । वैदेशिक रोजगार विभागले ८०० जना केयरगिभरका लागि आवेदन आह्वान गर्दै मंगलबार एक सूचना जारी गरेको हो । इजरायलमा कामको अवधि पाँच वर्षको हुनेछ ।

सूचना प्रकाशित भएको मितिले २१ दिनभत्रमा अनलाइन मार्फत इच्छुक योग्य व्यक्तिले आवेदन दिन सक्ने विभागले जनाएको छ । आवेदन दिन २५ वर्ष पुरा भई ४५ वर्ष ननाघेको, कम्तीमा १.५ मिटर अर्थात् पाँच फिट उचाइ र ४५ किलोग्राम तौल भएको हुनुपर्नेछ । कम्तीमा १० कक्षा उत्तीर्ण गरी अनमी वा सिएमए सम्बन्धी विषयमा कम्तीमा १५ महिनाको अध्ययन पुरा गरेको वा प्लस टु वा सो सरहको शैक्षिक योग्यता हासिल गरी नेपाल सरकारबाट मान्यताप्राप्त तालिम प्रदायक संस्थाबाट केयर गिभर सम्बन्धी तीन महिनाको तालिम प्राप्त गरेको हुनुपर्नेछ ।

त्यस्तै विगतमा इजरायल गई कार्य नगरेको, बाबु, आमा, पति ,पत्नी, छोरा, छोरी इजरायलमा बसोबास नगरेको वा कार्यरत नरहेको, शारीरिक र मानसिक रुपमा स्वस्थ रहेको हुनुपर्ने योग्यता तोकिएको छ ।

८०० जना माग गरिएकोमा ५०० जना मुख्य उम्मेदवार हुनेछन् भने ३०० जना वैकल्पिक उम्मेदवार हुनेछन् । जसमध्ये ६० प्रतिशत महिला र ४० प्रतिशत पुरुष हुनेछन् । उनीहरुले मासिक पाँच हजार ८८० सेकेल (इजरायली मुद्रा) न्यूनतम तलब हुनेछ । जुन नेपालका दुई लाख १० हजार नेपाली रुपैयाँभन्दा बढी हुनेछ ।

यसअघि सन् २०२२ मा समेत एक हजार भन्दा बढी केयरगिभर रोजगारीका लागि इजरायल गएका थिए ।