बुढानिलकण्ठमा बसेर ‘छल गर्यो मायाले’ भनेर गीत गाउनुपर्ने अवस्था आउला भन्दै देउवालाई सम्झाए मेटमणिले

काठमाडौं– नेकपा (एकीकृत समाजवादी) का प्रमुख सचेतक मेटमणि चौधरीले अब बन्ने प्रधानमन्त्री केपी शर्मा ओलीले जुनसुकै हालतमा संसद् विघटन गर्ने दाबी गरेका छन् । ओलीले संसद् विघटन गर्ने कुराको साक्षी नबस्न नेपाली कांग्रेसका नेताहरुलाई आग्रह गरेका छन् ।

आज (शुक्रबार) प्रतिनिधिसभाको बैठकमा प्रधानमन्त्री पुष्पकमल दाहालले राखेको विश्वासको मतमाथिको छलफलमा भाग लिने क्रममा सांसद चौधरीले ओलीले एक सय प्रतिशत संसद् विघटन गर्ने भनेर दाबी गरेका छन् । उनले कांग्रेस सभापति शेरबहादुर देउवालाई आजको प्रधानमन्त्री प्रचण्डको जस्तै हालत अबको चार महिनामा हुनसक्नेतर्फ संकेत गरे ।

उनले त्यतिवेला बुढानिलकण्ठस्थित् निवासमा बसेर ‘छल गर्यो मायाले’ भनेर गीत गाउनुपर्ने अवस्था आउने भन्दै देउवालाई सम्झाए । उनले एमाले अध्यक्ष केपी शर्मा ओलीले यसअघि संविधानको धारा ७६ को २ प्रधानमन्त्रीले विश्वासको मत नपाएपछि धारा ७६ को ३ मा जाने भनेर बोलेको कुरा स्मरण गराए ।