कोपा अमेरिका २०२४ को उपाधि अर्जेन्टिनालाई

एजेन्सी – कोपा अमेरिका २०२४ को उपाधि अर्जेन्टिनाले जितेको छ । यसअघि २०२१ मा कोपा अमेरिकाको उपाधि जितेको अजेंन्टिनाले लगातार दोस्रो पटक उपाधि जितेको हो ।

कोलम्बियालाई अतिरिक्त समयमा १–० ले हराउँदै अर्जेन्टिनाले उपाधि आफ्नो नाममा गरेको हो । अर्जेन्टिनाका लागि लौतारो मार्टीनेजले १ सय १२औं मिनेटमा गोल गरे । ९७औं मिनेटमा मैदान प्रवेश गरेका उनले जियोभानी लो सेल्सोको थ्रु पासमा गोल गर्दै अर्जेन्टिनालाई उपाधि दिलाएका हुन् ।

लिसान्द्रो मार्टिनेजले मैदानको मध्यभागमा गरेको उत्कृष्ट ट्याकलपछि प्राप्त मौकामा उनले गोल गरेका थिए ।

६६औं मिनेटमा कप्तान तथा स्टार खेलाडी लियोनेल मेस्सीलाई चोटका कारण गुमाएको अर्जेन्टिनाले उपाधि भने जित्न सफल रह्यो ।

सन्‌ १९९४ पछि लामो समय कुनै उपाधि जित्न नसकेको अर्जेन्टिनाले पछिल्लो ३ वर्षमा लगातार तीन उपाधि जितेको छ । २०२१ मा कोपा अमेरिका जितेपछि अर्जेन्टिनाले २०२२ मा विश्वकप उपाधि जितेको थियो ।