सिमलताल दुर्घटनामा मृत्यु भएकाको व्यक्तिको परिवारलाई मधेश सरकारले एक लाख राहत दिने

काठमाडौं– मधेश प्रदेश सरकारले गत २८ असारमा त्रिशूली नदीमा बस दुर्घटनामा परेका मधेश प्रदेशका मृतकका परिवारलाई एक लाख रुपैयाँ राहत दिने भएको छ ।

मधेश प्रदेशका मुख्यमन्त्री शतिशकुमार सिंहले मधेश प्रदेशका जिल्लाका मृतकका पीडित परिवारलाई प्रतिव्यक्ति एक लाख रुपैयाँका दरले राहत उपलब्ध गराउने घोषणा गरेका छन् ।

उनले भने, ‘दुर्घटनामा परी ज्यान गुमाउनेका पीडित परिवारलाई राहत दिने घोषणा गरेका छौँ,’ मुख्यमन्त्री सिंहले भने, ‘मुख्यमन्त्री कार्यालयले घोषणा गरिसकेको छ ।’ प्रमुख जिल्ला अधिकारीको सिफारिसका आधारमा राहत रकम प्रदान गर्ने उनले बताएका छन् ।

यही असार २८ गते शुक्रबार बिहान वीरगञ्जबाट काठमाडौँतर्फ जाँदै गरेको बागमती प्रदेश ०३–००६ ख १५१६ नम्बरको एञ्जल डिलक्स र काठमाडौँबाट गौर जान आउँदै गरेको वाग्मति प्रदेश ०३२४९५ ख ००१ नम्बरको गणपति डिलक्स बस सिमलतालमा खसेको पहिरोसँगै बगेर त्रिशूली नदीमा बेपत्ता भएको थियो । उक्त बसमा सवार ६५ जनामध्ये तीन जना सकुशल निस्किएका थिए भने ६२ जना बेपत्ता भएका थिए ।

बेपत्ता भएकामध्ये हालसम्म १७ जनाको शव फेला परेको छ भने ४५ जनाको अवस्था अझै अनविज्ञ छ ।