यात्रुबाहक बस र दुध बोक्ने टयांकर ठोक्किँदा १२ यात्रु घाइते

धनकुटा— धनकुटा नगरपालिका–१ सुकेपोखरीनजिक यात्रुबाहक बस र दुध बोक्ने टयांकर एकापसमा ठोक्किँदा १२ यात्रु घाइते भएका छन् ।

धरानबाट संखुवासभाको धर्मदेवी नगरपालिकाको आँखीभुईंतर्फ जाँदै गरेको बा २ ख ७२४७ नम्बरको बस र विपरीत दिशाबाट धनकुटातर्फ आउँदै गरेको को १ च १५३१ नम्बरको दुध बोक्ने ट्यांकर एकापसमा बिहान करिब पौने १२ बजे ठोक्किएर दुर्घटना भएको हो ।

घाइतेहरुको धनकुटा जिल्ला अस्पतालमा उपचार भइरहेको छ । घाइते सबैको अवस्था सामान्य रहेको जिल्ला प्रहरी प्रमुख श्यामसिं चौधरीले जानकारी दिए । घाइते अधिकांशको अनुहार, हात र खुट्टामा चोट लागेको छ ।

बसले धरानबाट छुटे लगत्तै मोटरसाइकललाई ठक्कर दिएको यात्रुहरुले बताए । बसको चालकको लापर्बाहीले दुर्घटना भएको प्रहरीको प्रारम्भिक अनुसन्धानले पुष्टि भएको जनाईएको छ ।