बागमती प्रदेशका मुख्यमन्त्रीले पाए विश्वासको मत

काठमाडौं– बागमती प्रदेशका मुख्यमन्त्री बहादुरसिंह लामा तामाङले विश्वासको मत पाएका छन्। मुख्यमन्त्रीले मंगलबार प्रदेश सभामा विश्वासको मतसम्बन्धी राखेको प्रस्तावका पक्षमा बहुमत सांसदहरूले मत दिएका हुन्।

मुख्यमन्त्रीको प्रस्तावका पक्षमा ६४ मत, विपक्षमा ३५ र तटस्थमा ३ मत परेको सभामुख भुवनकुमार पाठकले बताए।

‘मुख्यमन्त्रीले आफूमाथि प्रदेश सभाको विश्वास छ भनी राख्नुभएको विश्वासको मतसम्बन्धी प्रस्तावमा ६४ मत परेको र उक्त संख्या प्रदेश सभामा तत्काल कायम रहेको सम्पूर्ण सदस्य संख्याको बहुमत भएकोले मुख्यमन्त्रीको प्रस्ताव बहुमतले पारित भएको घोषणा गर्दछु,’ सभामुख पाठकले मंगलबारको प्रदेश सभा बैठकमा भने।