बच्चालाई जन्म दिएको केही समयमा नै शिक्षिका आमाले त्यागिन् प्राण, आइसियु नभएको अस्पतालमा अपरेशन

रुपन्देही– शल्यक्रियाबाट प्रसुति गरेको केही घण्टामा नै सुत्केरीको मृत्यु भएपछि अस्पतालमा आइसियु नभएकाले मृत्यु भएको भन्दै आफन्तले आन्दोलन गरेका छन् ।

मणिग्रामस्थित शान्ति नमूना माविमा अध्यापनरत सिर्जना पौडेलले रुपन्देहीको तिलोत्तमा ४ स्थित ओम अस्पतालमा शल्यक्रियामार्फत छोरीलाई जन्म दिएकी थिइन् । तर सुत्केरी हुँदा सामान्य अवस्थामा नै रहेको उनको केही घण्टापछि मृत्यु भएको हो । सोपछि शल्यक्रिया गर्ने अस्पतालमा आइसियु नभएको कारण सिर्जनालाई गुमाउनुपरेको उनका आफन्तले आरोप लगाएका हुन् ।

मंगलबार साँंझ सिर्जनालाई सुत्केरी गराउन अस्पताल लगिएको थियो । उनले सर्जरीमार्फत साढे आठ बजे छोरीलाई जन्मदिइन् । उनी बुधबार दिउँसोसम्म भर्खरै जन्मेको छोरीलाई हेरेर खुसी भएकी थिइन् । तर दिउँसो तीनबजेपछि सिर्जनालाई आइसियुमा राख्नुपर्ने भएको डाक्टरहरुले बताउन थाले । तर सो अस्पतालमा आइसियूको सुविधा भने थिएन ।

सोपछि उनलाई रेफर गरेर लुम्विनी प्रादेशिक अस्पतालमा पुर्याइयो । त्यहाँ पुगेर रगत चेकजाँच गर्दा उनको रगतमा खराबी देखियो । परिवारका अनुसार उनलाई सेतो रगतको आवश्यकता परेको थियो । बुटवल रक्तसञ्चार केन्द्रमा सेतो रगत बनाउने मेशिन बिग्रीएको भन्दै रगत नपाएपछि उनको रगतलाई सेतो रगत बनाउन भैरहवा मेडिकल कलेज लगियो ।

यी सबै घटनाहुँदा रातको १२ बजेको थियो भने समयमा उपचार नपाएर त्यतीबेलासम्म सिर्जनाले संसार छाडिसकेकी थिइन् । सोपछि सुत्केरी हुँदासम्म सामान्य अवस्थामा रहेकी सिर्जनाको स्वास्थ्य अवस्था अचानक जटिल भएको र आइसियु नहुँदा लुम्विनी प्रादेशिक अस्पतालमा रेफर गरेको केही घण्टाभित्रै अकस्मात मृत्यु भएको भन्दै आफन्तहरुले दोषीमाथि कारबाहीको माग गरेका छन् । आइसियु नै नभएको अस्पतालमा शल्यक्रिया गर्न दिने व्यवस्था, ब्लड बैङ्कमा सेतो प्लेटलेट्स बनाउने मेशिन नै नचलेको अवस्थाले अकालमा ज्यान गुमेको भन्दै उनीहरु आन्दोलित भएका हुन् ।