पल र पूजाको चलचित्र ‘रामायण’को टिजर आएपछि समिक्षाको कटाक्षः हिजो घाँटी काटाकाट, आज माया साटासाट
काठमाडौं- गायिका समिक्षा अधिकारीले पल शाह र पुजा शर्माप्रति कटाक्ष हानेकी छिन् । पुजा शर्माको लगानीमा रहेको चलचित्र रामायणको टिजर सार्वजनिक भएसँगै उनले सामाजिक सञ्जाल फेसबुकमार्फत कटाक्ष हानेकी हुन् ।
उनले लेखेकी छिन्, ‘हिजो घाँटी काटाकाट, आज माया साटासाट वाह रे वाह । सम्बन्ध त सधै समुन्द्र जस्तो सदावहार र शान्त होस् न । गड्गडाएर जति नै हल्ला गरेपनि बर्खे भेल त २ घण्टामा सुकि जान्छ। त्यस्तो कहिल्यै नहोस् ।’
चलचित्र ए मेरो हजुर २ प्रदर्शन हुनुअघि पल शाह बलात्कार मुद्दामा हिरासतमा रहँदा चलचित्र प्रिमियरमा पूजा शर्मा पललाई सम्झिँदै रोएकी थिइन् । चलचित्र हल हलमा पुगेर पल शाहका लागि भएपनि चलचित्र हेर्नसमेत आग्रह गरेकी थिइन् । फलस्वरुप चलचित्रको कथा र अभिनय जस्तो भएपनि पूजाको आँशुकै कारण दर्शकहरुले फिल्म हेरिदिए । त्यसबेला पलको बचाउमा पूजाले समीक्षाप्रति लक्षित गर्दै अस्वभाविक अभिव्यक्ति समेत दिएकी थिइन् । तर, पल जेलमुक्त भएपछि पूजा उनीसँग रिसाएकी थिइन् ।
नाबालिक बलात्कारको मुद्दामा पल शाहले मुुद्दा खेपिरहेको बेलामा पूजा शर्मा समीक्षासँग निकट थिइन् । सामाजिक सञ्जालमा पूजा र समिक्षासँगै भएको फोटो र टिकटक भिडियो बनाएर पोस्ट गरिरहन्थे । सोहि समयताका पूजा र पलबीच समेत सम्बन्ध राम्रो थिएन । एउटै कार्यक्रममा पनि उनीहरु एक अर्कासँग तर्केर हिँड्थे ।
तर पछिल्लो समय चलचित्र ‘रामायण’का कारण पूजा र पल नजिकिएका छन् । पूजाको लगानीमा रहेको उक्त चलचित्रमा पल र पूजाको जोडी पुन एक पटक देखिँदैछ । चलचित्र रामायणमा दुई कलाकार नजिकिएपछि समिक्षाले यस अघिपनि पूजा शर्मालाई ‘बहुरुपी औरत’ भन्दै कटाक्ष हानेकी थिइन् । ‘अस्ति सिनेमा चलाउन रोएको नाटक गरेऊ । हिजो उसैलाई नानाथरी भन्दै मेरो पाउ पर्यौ । आज फेरि आफ्नो फाइदाका लागि उतैतिर चाकडी गर्दै रहेछौ । बहुरुपी औरत ।’
रोएर फिल्म चलाउने नायिकाभन्दै चौतर्फी आलोचनापछि पछिल्लो समयमा पूजा फिल्म नचलाउने नरुने बताउँदै आएकी छिन् । नरुँदा एक्सन अवतारमा देखिएकी पूजाको पछिल्लो चलचित्र दान्भी फ्लप भएको छ । पछिल्लो चलचित्र फ्लप भएपछि आफ्नै लगानीमा रहेको फिल्म ‘रामायण’ चलाउनै पर्ने दबाब पूजालाई छ । पल र पूजाको यो जोडीलाई पूजाले नरोइकन यो पटक हलमा चलाउन सक्छिन् की सक्दिनन् भने हेर्न बाँकी छ ।