कक्षा १२ मा फेल भएका विद्यार्थीको प्रवेश परिक्षा शुल्क फिर्ता गर्दै चिकित्सा शिक्षा आयोग

काठमाडौं– कक्षा १२ को नतिजा नआइकन प्रवेश परिक्षाको फारम खुलाएको चिकित्सा शिक्षा आयोगले नतिजामा एनजी आएका विद्यार्थीको रकम फिर्ता गर्ने भएको छ ।

आयोगले कक्षा १२ को नतिजा नआउँदै चिकित्सा शिक्षाका कार्यक्रमका लागि प्रवेश परीक्षाको फारम भर्न दिने निर्णय गरेको थियो । तर, कक्षा १२ मै फेल भएपछि फारम भरेका विद्यार्थीहरु अन्योलमा परेका थिए। विद्यार्थीहरुले रकम फिर्ता पाउनुपर्ने भन्दै विरोध गरेपछि आयोगले पैसा फिर्ता दिने निर्णय गरेको हो ।

चिकित्सा शिक्षाको स्नातक तहमा एमबीबीएस, बीडिएस, नर्सिङसहित १३ वटा विषयको अध्ययन अध्यापन हुन्छ । ती विषय अध्ययनका लागि चिकित्सा शिक्षा आयोगले लिने एकीकृत प्रवेश परीक्षा पास हुनुपर्छ । यो वर्षको नयाँ शैक्षिक सत्रका लागि आयोगले गत जेठ ३० देखि असार १८ सम्म अनलाइन आवेदन आह्वान गरेको थियो ।

५१ हजार ७ सय ४४ विद्यार्थीले विभिन्न विषयमा अध्ययनका लागि आवेदन दिएका थिए । कतिपय विद्यार्थीले दुई वा तीन विषयसम्मको पनि परीक्षाका लागि आवेदन दिएका छन् । प्रतिविद्यार्थी प्रति विषय ४ हजारका दरले ५१ हजार विद्यार्थीबाट आयोगले २१ करोड रुपैयाँभन्दा बढी राजस्व संकलन गरेको छ ।

तर कक्षा १२ को नतिजा आउँदा फारम भरेकामध्ये ३५ सयभन्दा बढी कक्षा १२ मा फेल भएका छन् अर्थात् अब उनीहरु प्रवेश परिक्षामा सहभागी हुन पाउने छैनन् । फेल भएका विद्यार्थीहरु आफूहरुलाई प्रवेश परीक्षामा सहभागी गराउन माग गर्दै उच्च अदालतसम्म पुगेका थिए । अदालतले पुनर्योगको आवेदन दिएकालाई प्रवेश परीक्षामा सामेल गराउन अन्तरिम आदेश दिएको छ । एकीकृत प्रवेश परीक्षा भदौ १ देखि सुरु हुदैँछ ।

यसैबिच आयोगले बुधबार प्रवेश परीक्षा दिन नपाउने विद्यार्थीहरुको शुल्क फिर्ता दिने निर्णय गरेको हो ।