घाँस काट्न जाँदा भीरबाट खसेर किशोरीको मृत्यु

जाजरकोट– जाजरकोटमा एक किशोरीको भीरबाट लडेर मृत्यु भएको छ । छेडागाड नगरपालिका–१ जाल्माकी १४ वर्षीया मनिषा विकको भीरबाट लडेर मृत्यु भएको हो ।

बुधबार घर नजिकैको जङ्गलमा घाँस काट्न जाँदा भीरबाट लडेर उनी घाइते भएकी थिइन् । उनको उपचारको क्रममा बिहिबार मृत्यु भएको जिल्ला प्रहरी कार्यालय जाजरकोटले जनाएको छ ।

यस्तै जुनीचाँदै गाउँपालिका–११ स्थित खानाखोला तर्दै गर्दा तीन दिन अघि चिप्लिएर खोलामा एक जना बेपत्ता भएका युवक अझै भेटिएका छैनन् । खोलामा बेपत्ता जुनीचाँदे गाउँपालिका–१० का २१ वर्षिय तेजबहादुर रोकायको खोजी भइरहेको र हालसम्म फेला पार्न नसकेको जिल्ला प्रहरी कार्यालय जाजरकोटका प्रमुख पुरुषोत्तम पाण्डेले जानकारी दिए ।