बालेनको प्रशंसा गरेर गीत गाउँदा सरुवा गरिएको कर्मचारीको दाबी, पोखराका मेयर भन्छन्, ‘गीत गाउनु उहाँको स्वतन्त्रता’

काठमाडौं– बालेन शाहको गीत सार्वजनिक गरेको कारण आफ्नो सरुवा भएको एक कर्मचारीले दाबी गरेकी छिन् । पोखरा महानगरपालिका सामाजिक विकास महाशाखामा कार्यरत सातौं तहकी अधिकृत चन्द्रावती वाग्लेले बालेनको तारिफमा गीत गाएको कारण सरुवा भएको बताएकी हुन् ।

वाग्लेले करिब एक महिना पहिले बालेनको तारिफ गर्दै तिजको गीत युट्युबमा सार्वजनिक गरेकी थिइन् । जहाँ उनले काठमाडौं महानगरपालिकाका मेयर बालेन्द्र शाह (बालेन)ले गरेका कामहरुको प्रशंसा गरेकी छिन् ।

उनले बालेनलाई उपमेयर सुनिता डंगोलसँग मिलेर काठमाडौंको विकास गरिरहेको बताएकी छिन् । बालेनले शहर राम्रो बनाउन गरेका कामहरु, टुकुचा फर्काउन, सरकारी जमिन फर्काउन गरेका कामहरुको तारिफ गरेकी छिन् । उनले विपन्नका लागि शिक्षामा छात्रावृत्ति र अस्पतालमा बेडको व्यवस्था मिलाएको भन्दै उनको सिको अरु नेताहरुले पनि गर्नुपर्ने भन्दै बालेन बोलको तिजको गीत सार्वजनिक गरेकी छिन् ।

युट्युबमा सार्वजनिक उनको गीतमा वाग्लेकै शब्द÷संगीत र स्वर छ । उनले चन्दवती वाग्ले युट्युब च्यानलमार्फत नै उक्त भिडियो सार्वजनिक गरेकी छिन् । तर उक्त गीत सार्वजनिक गरेकै कारण उनले आफ्नो सरुवा पोखरा महानगरपालिकाबाट दुर्गममा भएको भन्दै विरोध गरेकी छिन् । करिब ५ वर्ष पोखरा महानगरको वडा नम्बर ३ मा काम गरेकी वाग्लेको तीन महिना पहिले वडा नं २३ मा सरुवा भएको थियो । वडा नं ३ वडा नं २३ को तुलनामा दुर्गम मानिन्छ । तर उनको तीन महिना नपुग्दै पुन पहिला काम गरेकै दुर्गम वडामा सरुवा भएपछि उनले आफुले बालेको गीत गाएको कारण सरुवा भएको आरोप लगाएकी हुन् ।

पोखरा महानगरपालिकाको कर्मचारीको पदस्थापन, सरुवा र कामकाजमा खटाउने मापदण्ड २०८० ले महाशाखा, शाखा, वडा कार्यालय, आयोग, समिति र कार्यालयमा कार्यरत कर्मचारीलाई न्यूनतम एक वर्षमा सरूवा गर्न सकिने उल्लेख छ । तर तीन महिनामा नै सरुवा भएपछि महानगरकै कानुन विपरित भएको चन्द्रावतीको दावी छ ।

महानगरले आफुलाई ‘सातौं तहका कर्मचारीले वडा सम्हाल्ने’ भन्दै सरुवा गरेको भएपनि सुगम वडामा पनि छैटौं तहका कर्मचारीलाई वडाको जिम्मेवारी दिइएको पाएको बताएकी छिन् । उनले अरुबाट काठमाडौंका मेयर बालेन शाहको प्रशंसामा गीत निकालेपछि कारबाहीस्वरूप मेयरको निर्देशनमा सरुवा भएको थाहा पाएको .बताएकी छिन् ।

उक्त विषयमा महानगरका प्रमुख प्रशासकीय अधिकृत काठमाडौं गएकाले बुझ्न नपाएको भन्दै उनले हाकिमसँग कुरा गरेपछि मात्र सरुवा भएको ठाउँमा जाने अडान लिएकी छिन् । तर जुनसुकै हातलमा पनि युट्युबमा आठ लाख कटिसकेको आफ्नो गीत नहटाउने उनको अडान छ ।

यस विषयमा महानगरका मेयर धनराज आचार्यले कर्मचारीको सरुवाको विषयमा आफ्नो हस्तक्षप नरहने बताएका छन् । कर्मचारीको जिम्मेवारी प्रमुख प्रशासकीय अधिकृतको भएको र कसलाई सरुवा गर्ने निणर्य आफुले नलिने उनको भनाइ छ । उनले जस्तो गीत सार्वजनिक गाएपनि व्यक्तिको स्वतन्त्रताको विषय रहेको बताएका छन् । मेयर आचार्यले वाग्लेले बालेनको प्रसंसा गर्दै गाएको गीतमा कुनै आपत्ती नरहेको बताएका छन् । उनले भने, ‘यो उहाँको स्वतन्त्रताको कुरा हो, सबैले आफ्नो अभिव्यक्ति र विचार सम्प्रेषण गर्न पाउँछन् ।’