चितवनमा गुडिरहेको कारमाथि खस्यो ढुंगा
चितवन– चितवनको नारायणगढ मुग्लिन सडकखण्डमा गुडिरहेको कारमाथि ढुंगा खस्दा कारमा सामान्य क्षति पुगेको छ ।
ईच्छाकामना गाउँपालिका–५ पर्ने सो सडकखण्डको तीन नम्बर पुल नजिकै मुग्लिङबाट नारायणगढतर्फ आउँदै गरेको बीएडी ८३२२ नं. को कारमा बिहान ८ बजेको समयमा माथिबाट ढुंगा खसेको हो । कारमा सामान्य क्षतिबाहेक अन्य क्षति नभएको प्रहरीले जनाएको छ ।
उक्त कार भरतपुर महानगरपालिका–२ बस्ने सन्तोष कचिलाले चलाइरहेका थिए । घटनापछि कार आफ्नो गन्तव्यमा गइसकेको र हाल सडक सञ्चालनमा आएको प्रहरीले जानकारी दिएको छ ।
पछिल्लो समयमा चितवनका राजमार्गमा पहिरो खस्ने क्रम बढीरहेको छ । यसैक्रममा गएराति देखि नै चितवनसहितका आसपासका क्षेत्रमा पानी परिरहेकाले सावधानी अपनाएर यात्रा गर्न प्रहरीले अनुरोध गरेको छ ।
असार २८ गते पनि सोही सडकखण्डमा यात्रुवाहक बसमाथि ढुंगा खस्दा चालकको मृत्यु भएको थियो ।