‘स्त्री–२’ सर्वाधिक दुईसय करोड कटाउने चौँथो फिल्म

नयाँ दिल्ली– श्रद्धा कपूर, राजकुमार राव र पंकज त्रिपाठीको हरर कमेडी फिल्म स्त्री–२ ले बक्स अफिसमा कीर्तिमानी कमाइ गरिरहेको छ । अमर कौशिक निर्देशनमा बनेको फिल्मले रिलिज भएको दुई दिनमा नै लगानी उठाउन सफल भएको थियो ।

तेस्रो दिनको आम्दानी जोड्ने हो भने यसको कमाई बजेटभन्दा तीन गुणा छ । अगस्ट १५ मा रिलिज भएको सो फिल्मले पहिलो दिन ५५ करोड ४० लाख भारु र दोस्रो दिनमा ३५ करोड ३० लाख भारु कमाइ गरेको थियो ।

शनिबार फिल्मले ४५ करोड ७० लाख भारु कमायो । आइतबार फिल्मको कमाई ५८ करोड २० लाख भारु थियो । सोमबार फिल्मको अनुमानित कमाई करिब ३७ करोड भारु रहेको बताइएको छ । रिलिज भएको ५ दिनमा फिल्मको कमाई २२८ करोड ४५ लाख भारु पुगिसकेको छ ।

विश्व बजारमा भने फिल्मले ३०० करोड भारु कमाइ सकेको छ । योसँगै फिल्म २०० करोड भारु कमाउने श्रद्धा कपुरको पहिलो फिल्म बनेको छ । यस्तै ‘स्त्री–२’ भारतमा २०० करोड कमाउने चौथो हिन्दी फिल्म बनेको छ । यसअघि सबैभन्दा छिटो दुई करोड कटाउने फिल्ममा शाहरुख खानको जवान, रणवीर कपुरको एनिमल र शाहरुख खानको पठान रहेका छन् ।