खाजा खाने बहानामा बोलाएर किशोरीमाथि सामूहिक बलात्कार, ६ जना पक्राउ

झापा— झापाको अर्जुनधारामा १६ वर्षकी एक किशोरीमाथि सामूहिक बलात्कार भएको छ । बलात्कारमा संलग्न भएको आरोपमा ६ जनालाई प्रहरीले पक्राउ गरेको छ । एक जना फरार छन् ।

किशोरीको बयानका आधारमा अर्जुनधाराको लंका होटलका कुक सुदीप श्रेष्ठ र सुजन डाँगी, अर्जुनधारा–७ का अनिस लिम्बू, सरोज राई, केशब मगर, सुनिल राजवंशी छन् । आरोपी अर्जुनधाराकै सञ्जीव तामाङ फरार छन् ।

किशोरीका अनुसार चिनजानका दुई जना युवाहरूले उनलाई शुक्रबार साँझ खाजा खाने वहानामा स्थानीय लंका होटल लगेका थिए । खाजा खाएर उनीहरू घुम्न भनी निस्केका र स्थानीय बाख्राहट्टीनजिकै उनीमाथि चार जनाले सामूहिक बलात्कार गरेका थिए । प्रहरीकाअनुसार पछि लंका होटलका कुक सुदीप श्रेष्ठ र सुजन डाँगीले उनलाई होटलमा राखेर बलात्कार गरेका थिए ।

किशोरी बलात्कारमा संलग्नहरुलाई पक्राउ गरि अनुसन्धान सुरु गरिएको प्रहरीले जनाएको छ । किशोरीले शनिबार उजुरी दिएपछि तत्काल चार जनालाई पक्राउ गरेको थियो । थप दुई जना आइतबार पक्राउ परेका हुन् ।