बसको ठक्करबाट झापामा महिलाको मृत्यु

झापा– पूर्वपश्चिम राजमार्गस्थित झापा जिल्लाको बिर्तामोडमा बसको ठक्करबाट शनिबार साँझ एक महिलाको मृत्यु भएको छ । इलाम माई नगरपालिका–४ की ३० वर्षीया तुलसा पाँचकोटीको बसको ठक्करका कारण मृत्यु भएको हो ।

प्र १–०२–००२ ख ००३५ नम्बरको यात्रुवाहक बसले बाटो क्रस गर्दै गरेको प्र १–०१–०१३ प ५७०० नम्बरको मोटरसाइकललाई ठक्कर दिएको थियो ।

बसको ठक्करबाट मोटरसाइकलको पछाडि बसेकी उनी घाइते भएपछि विर्तामोडमा रहेको बीएन्डसी अस्पतालमा उपचारका लागि पठाइएको थियो । उपचारका लागि अस्पताल लैजाँदै गर्दा उनको बाटैमा मृत्यु भएको प्रहरीले जनाएको छ ।

बस चालक कन्काई नगरपालिका–३ बस्ने २९ वर्षीय हिमाल विश्वकर्मा र मोटरसाइकल चालक माई नगरपालिका– ४ का ठिरप्रसाद सुवेदीसमेतलाई नियन्त्रणमा लिई प्रहरीले अनुसन्धान अघि बढाएको छ ।