माछा मार्ने क्रममा खोलाले बगाएर बेपत्ता

गुल्मी– खोलाले बगाएर गुल्मीमा एक जना बेपत्ता भएका छन् । चन्द्रकोट गाउँपालिका वडा नम्बर–८ मजुवाका १६ वर्षीय असिम कुमाललाई खोलाले बगाएको जिल्ला प्रहरी कार्यालय गुल्मीले जनाएको छ ।

आइतबार बिहान ८ः३५ बजेको समयमा जालद्वारा माछा मार्ने क्रममा कुमाललाई स्थानीय बडिगाड खोलाले बगाएको जिल्ला प्रहरी कार्यालय गुल्मीले जनाएको छ । घटनाबारे जानकारी पाउनासाथ प्रहरी चौकी मजुवाका प्रहरी सहायक निरीक्षक रामबहादुर कार्कीको कमाण्डमा चार जनाको प्रहरी टोली, सशस्त्र प्रहरी बिपत उद्धार बेसबाट सहायक प्रहरी नायब निरीक्षक खडग पेमीको कमाण्डमा सात जनाको टोली र स्थानीय समेत मिलेर खोजी कार्य भइरहेको प्रहरीले जनाएको छ ।