पतिसँग सम्बन्धविच्छेदपछि दुबईकी राजकुमारीले ल्याइन् ‘डिभोर्स’ पफ्युम

दुबई– संयुक्त अरब इमिरेट्स (युएई)का उपराष्ट्रपति तथा दुबईका शासक शेख मोहम्मद बिन रसिद अल मकतूमकी छोरी राजकुमारी शेखा माहराले डिभोर्स नाम परेको पफ्युम लन्च गरेकी छिन् । यसकारण पछिल्लो समय उनको निकै चर्चा चुलिएको छ । यसअघि उनी पति शेख माना बिन मोहम्मद बिन रसिद बिन मना अल मकतूमलाई ‘तलाक’ दिएका कारण संसारभरी चर्चामा आएकी थिइन् ।

दुबईकी ३० वर्षीया राजकुमारी शेखा माहराले २०२३ को ‘मे’ मा विवाह गरेकी थिइन् । तर श्रीमान अरुसँग सम्बन्धमा रहेको भन्दै केहीसमय अघि सम्बन्ध विच्छेदको सार्वजनिक रुपमा घोषणा गरेकी थिइन् । उनका श्रीमान र उनको गत मे मा एक छोरी समेत जन्मिएकी छिन् । दुबई जस्तो कट्टर देशमा श्रीमानलाई सार्वजनिक रूपमा सम्बन्ध विच्छेद दिएर चर्चित बनेकी उनले नयाँ परफ्युम लन्च गरेकी हुन् ।

जसको नाम ‘डिभोर्स’ राखेकी छिन् । उनले आफ्नो ब्राण्ड माहरा एम १ अन्तर्गत डिभोर्स नाम गरेको पर्फ्युम लन्च गरेको सोमबार आफ्नो इन्स्टाग्राम एकाउन्टमार्फत जानकारी दिएकी हुन् ।

उनले इन्टाग्राममा पर्फ्युमको टिजर शेयर गरेकी छन् । पोस्टमा कालो पफ्युमको डब्बामा सेतो अक्षरले डिभोर्स लेखिएको छ । टिजरमा शिशाको टुक्रा, कालो पत्र र कालो ढुङ्गा देखाइएको छ ।