सिके राउतले गरे सम्बन्धविच्छेदको मुद्दा दायर

काठमाडौं– जनमत पार्टीका अध्यक्ष तथा प्रतिनिधि सभा सदस्य डा.सिके राउतले जिल्ला अदालत ललितपुरमा सम्बन्धविच्छेदको मुद्दा दायर गरेका छन्।

राउतले श्रीमती सोनी सिन्धु रानीसँग सम्बन्धबिच्छेदको मुद्दा दायर गरेका हुन्। उनले ‘अंश र सम्बन्धविच्छेद’ शीर्षकमा गत भदौ १२ गते मुद्दा दायर गरेको जिल्ला अदालत ललितपुरका प्रवक्ता राम सजिवन महतोले जानकारी दिए।

उनीहरु महालक्ष्मी नगरपालिका वडा नम्बर ४ इमाडोल बस्दै आएका छन् । राउतले आफूहरूको सम्बन्ध नमिलेका कारणले विच्छेद गरिपाऊँ भन्दै मुद्दा दायर गरेका हुन्।

उनकी श्रीमती रानी भारतीय नागरिक हुन्। उनी माइतीमा मात्रै जाने गरेको, सम्बन्ध राम्रो नभएको, लगायतका विषयहरू उल्लेख गरेका छन्।

उनीहरूका दुई छोरी र एक छोरा छन्। छोराछोरीलाई पनि आफूसँगै राख्न राउतले माग गरेका छन्।