आइफोन १६ सँग बजारमा प्रतिस्पर्धा गर्न चिनियाँ कम्पनी ह्वावेको नयाँ फोन

काठमाडौं— एप्पलले आइफोन १६ का विभिन्न मोडल सार्वजनिक एक दिन पछि चिनियाँ कम्पनी ह्वावेले नयाँ मोडलको मोबाइल सार्वजनिक गरेको छ । आइफोन १६ सँग बजारमा प्रतिस्पर्धामा उत्रने उदेश्यले आइफोन १६ लन्च भएको एक दिनपछि ह्वावेले नयाँ फोन सार्वजनिक गरेको हो ।

अमेरिकाको क्यालिफोर्नियास्थित एप्पलको मुख्य कार्यालयमा सोमबार एक कार्यक्रमका बिचमा आइफोन १६ सार्वजनिक गर्यो। आइफोन १६ सिरिजअन्तर्गत आइफोन १६, आइफोन १६ प्लस, आइफोन १६ प्रो र आइफोन १६ प्रो म्याक्स सार्वजनिक भए ।

उता चिनियाँ स्मार्टफोन निर्माता कम्पनी ह्वावेले तीन पटक फोल्ड गर्न सकिने ‘ह्वावे ट्राइफोल्ड मेट एक्सटी’फोन सार्वजनिक गरेको छ । आईफोन १६ सिरिज सार्वजनिक गरेको एक दिनपछि कम्पनीले फोन सार्वजनिक गरेको हो ।

ह्वावेका फोन अमेरिकी बजारमा प्रतिबन्ध गरिएको छ । यो अबस्थामा चिनमा आइफोनको व्यापार कमजोर बनाउन ह्वावेले उक्त मोबाइल लन्च गरेको हो । गत वर्ष आईफोन १५ सार्वजनिक हुँदा ह्वावेले मेट ६० प्रो सार्वजनिक गरेको थियो । जसकारण चिनियाँ बजारमा आईफोन १५ को बिक्री घटेको विश्लेषण गरिएको छ ।

आइफोन १६ को मूल्य ७ सय ९९ डलर, आइफोन १६ प्लसको ८ सय ९९, आइफोन १६ प्रोको ९ सय ९९ र प्रो म्याक्सको मूल्य १ हजार १ सय ९९ डलरबाट सुरु हुन्छ । शुक्रबारबाट अग्रिम अर्डर दिन सकिने एप्पलले जनाएको छ ।

उता ह्वावेको मोबाइलको भने शनिबारबाट नै अग्रिम अर्डर सुरु भइसकेको छ । तत्कालको लागि चिनमा मात्र उपलब्ध हुने यो मोबाइलको ४० लाख बढीले प्रि–अर्डर गरिसकेका छन् । कम्पनीले पाँच वर्षसम्म खोज तथा अनुसन्धान गरेर यो फोन तयार गरेको हो । यस फोनको सुरुवाती मूल्य १९ हजार ९९९ युआन (करिब तीन लाख ७६ हजार रुपैयाँ) रहेको छ ।

यो मोबाइल फोल्ड नगर्दा ३।६ एमएम चौडाइको हुन्छ । यसमा १०.२ इन्चको स्क्रिन दिइएको छ । फोनको डिस्प्लेलाई एउटा, दुई ओटा वा तीन ओटासम्म स्क्रिन बनाएर हेर्न सकिन्छ । यसमा १.९ एमएम चौडाइ भएको ब्याट्री प्रयोग गरिएको छ । यस फोनले फोल्डेबल किबोर्ड पनि सपोर्ट गर्ने बताइएको छ ।

आइफोन १६ र ‘ह्वावे ट्राइफोल्ड मेट एक्सटी २० सेप्टेम्बरबाट बजारमा उपलब्ध हुनेछन् ।