गएराति धोबिखोलामा खसेको ट्याक्सी भेटियो
काठमाडौं– आइतबार राति नयाँ बानेश्वरस्थित सडकबाट धोबिखोलामा खसेको ट्याक्सी फेला परेको छ । सोमबार बिहान ललितपुरको युएन पार्कनजिक बागमती नदीमा ट्याक्सी भेटिएको जिल्ला प्रहरी परिसर काठमाडौंका प्रवक्ता एसपी नवराज अधिकारीले जानकारी दिए।
आइतबार बेलुकी करिब सवा ८ बजे नयाँ बानेश्वरस्थित मदन भण्डारी कलेज अगाडि धोबीखोलामा ट्याक्सी खसेको थियो।
ट्याक्सी चालक उर्गेन लामालाई प्रहरीले भाटभटेनी नजिकैबाट उद्धार गरेको थियो। चालकको उद्धार गरिएपनि ट्याक्सी खोलाले बगाएको थियो।