सामाजिक सञ्जालमा हातहतियार देखाउँदै पोस्ट गर्ने युवक प्रहरीको नियन्त्रणमा
काठमाडौं – अराजक गतिविधि गरेको आरोपमा पर्साबाट एक युवक पक्राउ परेका छन् । सामाजिक सञ्जाल फेसबुक, टिकटक, इन्स्टाग्राममा हातहतियार देखाउँदै पोस्ट गरेको आरोपमा ती युवक पक्राउ परेका हुन् ।
वीरगञ्ज महानगरपालिका–१५ बस्ने २१ वर्षीय ओमकुमार पटेल पक्राउ परेका हुन् । उनलाई प्रहरीले मंगलबार वीरगञ्जको प्रतिमा चोकबाट पक्राउ गरेको हो ।
उनले सामाजिक सञ्जालमा किङ पर्सा नामबाट अकाउन्ट खोलेका छन् । सामाजिक सञ्जालमा अपशब्द प्रयोग गर्ने, गाली गर्ने, हातहतियार प्रदर्शन गरी त्रास सिर्जना गर्नेलगायत अराजक गतिविधि गरेको आरोपमा उनलाई प्रहरीले पक्राउ गरेको हो ।
सार्वजनिक शान्ति विरुद्धको कसूरमा उनीमाथी प्रहरीले अनुसन्धान अघि बढाएको छ । अराजक गतिविधिमा संलग्न अन्यको पनि प्रहरीले खोजतलाश गरिरहेको जनाएको छ ।