रावायणपछि पल शाहको करिअर संकटमाः मायावीको प्रदर्शन मिति सर्दा कल्लीबाट निकालिए

काठमाडौं– पौराणिक कथामा निर्माण हुन लागेको फिल्म ‘कल्ली’ बाट अभिनेता पल शाह बाहिरिएका छन् । गत साउन १५ मा फिल्ममा शीर्ष भुमिकामा देखिने भन्दै पल शाह रहेको पोस्टरसमेत सार्वजनिक भएको थियो । तर, हाल पलको सट्टामा सौगात मल्ल अनुबन्धित भएका छन्। निर्माण पलको फोटोसहितको पोस्टरसमेत हटाईको छ ।

पल शाहको अभिनय रहेको ‘रावायण’ फिल्म हाल सिनेमा हलमा चलिरहेको छ । फिल्मले सोचेजस्तो व्यापार गर्न सकिरहेको छैन । पलको फिल्मा देखिएको दाह्री लुक्सका कारण उनी सामाजिक सञ्जालमा ट्रोल भइरहेका छन् ।

फिल्मको शीर्ष भूमिकामा सौगातलाई लिइएको फिल्मका प्रस्तुतकर्ता किरण नेपालीले बताए। सौगात बाहेक अन्य चार जनाको अभिनय रहेको उनले जानकारी दिएका छन् ।

फिल्मको सम्झौता गरेको समयको एड्भान्स पनि निर्माण पक्षले माया मारेर पलसँगको सम्झौता तोडेको हो । फिल्मबाट निकालिएको कुरा निर्माताले सिधै पललाई नदिएर उनका सहयोगीमार्फत जानकारी गराएका छन्। यसबारे पलले निर्मातालाई कुनै प्रतिक्रिया दिएका छैनन् ।

रेड वर्ड प्रोडक्सन र कस्तुरी प्रोडक्सनको ब्यानरमा निर्माण हुने फिल्मलाई लक्ष्मण सुनारले लेखन तथा निर्देशन गर्दैछन्। फिल्ममा महेश दवाडीको पटकथा तथा संवाद रहनेछ। तिहारपछि छायांकन सुरू गर्ने योजनाका साथ तयारी भइरहेको जनाइएको छ।

छायांकन कर्णाली प्रदेशका विभिन्न रमणीय स्थानमा गर्ने तयारी निर्माण पक्षले गरिरहेको छ । फिल्मलाई नयाँ वर्ष २०८२ को छेको पारेर चैतको २९ गते रिलिज गरिने जनाइएको छ।

उता आगामी कार्तिक १५ गतेबाट प्रदर्शनमा आउने भनिएको पल शाहको फिल्म मायावीको प्रदर्शन मितिपनि सरेको छ । अब पुस २६ गते उक्त फिल्म प्रदर्शनमा आउने भएको छ ।

फिल्मका निर्देशक दिवाकर भट्टराईले प्रदर्शन मिति पोस्टपोन्ड भएको बताउँदै नयाँ मितिबारे जानकारी दिएका हुन्। अब कात्तिक १५ गते तिहारको अवसरमा प्रकाश सपुत र विजय बराल अभिनित ‘पूर्ण बहादुरको सारंगी’ र प्रदीप खड्काको ‘एक्टरस् टेक वन’ मात्रै रिलिज हुनेछन्।

पल अभिनित चलचित्र रावायणले अपेक्षित व्यापार गर्न नसकेका कारण तत्काल जोखिम नमोल्न निर्माण पक्षले मायावीको मिति सारेको चर्चा भईरहेको छ ।

नाबालिक बलात्कार मुद्दाबाट सफाइ पाएपछि पल ‘पुजार शार्की’ फिल्ममा सहायक भुमिकामा देखिएका थिए । उनको सो मुद्दापछि रावायण कमब्याक चलचित्र रहेको बताइएको थियो । तर फिल्मले राम्रो प्रदर्शन गर्न सकेन । उनको आगामी चलचित्र पनि प्रकाश सपुत र प्रदीप खड्कासँगको फिल्मसँग भिड्नबाट पछि हटेको छ भने सम्झौता गरिसकेको फिल्मबाट पनि निकालिएका छन् । यसले पलको आगामी फिल्मी करिअरमा संकट परेको पुष्टी गरेको छ ।