महिलाको हत्या आरोपमा बर्दियामा एक पुरुष पक्राउ
काठमाडौं– बर्दियाको बारबर्दिया नगरपालिका–५ तर्कापुरकी महिलाको हत्या आरोपमा एक जना पक्राउ परेका छन् ।
गयराती १२ बजेर २० मिनेटमा ३९ वर्षीया मीना थारुको हत्या भएको हो । बारबर्दिया नगरपालिका वडानम्बर ११ बस्ने अन्दाजी ४० वर्षीय शिवप्रसाद थारु (पप्पु)ले मीनाको हत्या गरेको प्रहरीले जनाएको छ । उनले मीनाको घरमै गएर टाउको र घाँटीमा धारिलो हतियार प्रहार गरेका थिए ।
मीनाको तत्काल उपचारका लागि बारबर्दिया नगर अस्पताल जयनगर लगिएको थियो । अस्पताल पुग्ने वित्तिकै उनलाई चिकित्सकले मृत घोषणा गरेका थिए ।
हत्यापछि फरार भएका शिवप्रसाद थारुलाई प्रहरीले बारबर्दिया नगरपालिका वडानम्बर ५ को सिटीबरेली क्षेत्रबाट पक्राउ गरेको छ । हालसम्म हत्याको कारण नखुलेको र अनुसन्धान भइरहेको प्रहरीले जानकारी दिएको छ ।