सिरहाबाट लागु औषध ल्याउने र रिसिभ गर्ने प्रहरीको फन्दामा
काठमाडौं– अवैध लागु औषध खैरो हेरोइनसहित तीन जनालाई पक्राउ परेका छन् । प्रहरी वृत्त थानकोटको टोलीले सिरहाको लहान नगरपालिका–१७ का २२ वर्षीय शिव शंकर ठाकुर, सोही ठाउँका २४ वर्षीय अर्जुन कुमार यादव र लहान–४ का २८ वर्षीय संजिवकुमार यादवलाई पक्राउ गरेको हो ।
जिल्ला प्रहरी परिसर काठमाडौंका एसपी तथा प्रवक्ता नवराज अधिकारीका अनुसार शिव र अर्जुनले सिरहाबाट लागु औषध खैरो हेराइन ल्याएका थिए । संजिव भने उक्त खैरो हेरोइन लिन ट्याक्सी लिएर नागढुंगा पुगेका थिए ।
शिव र अर्जुनले ल्याएको लागु औषध रिसिभ गर्न संजिव बा २ ज ७१६५ नम्बरको भाडाको ट्याक्सी लिएर नागढुंगा पुगेका थिए । उनीहरुलाई बिहीबार ६ बजेतिर प्रहरीले पक्राउ परेको हो ।
सिरहाबाट काठमाडौं आउँदै गरेको बागमती प्रदेश ०३–००१ ख २७२८ नम्बरको यात्रुबहाक बसबाट उनीहरु पक्राउ परेका हुन् । उनीहरुबाट ३७ ग्राम खैरो हेराइन बरामद भएको छ ।