बुवाको कुटपिट गरी हत्या गरेको अभियोगमा छोरा पक्राउ

सिराहा– आफ्नै बुवाको कुटपिट गरी हत्या गरेको अभियोगमा एक जना पक्राउ परेका छन् । सिराहाको औरही गाउँपालिका– ३ खजनपुर टोल बस्ने ३८ वर्षीय शैलेन्द्र कुमार यादवलाई ६५ वर्षीय बुबा भालेश्वर यादवलाई कुटपिट गरी हत्या गरेको अभियोगमा प्रहरीले पक्राउ गरेको छ । लाई सोमबार बेलुकी प्रहरीले पक्राउ गरेको हो ।

शैलेन्द्र र उनकै श्रीमती ३५ वर्षीया रेणु कुमारी यादवले घरायसी विवादको कारण भालेश्वरलाई कुटपिट गरेका थिए । कुटपिट गर्दा उनी घाइते भएका थिए । सो खबर पाउनासाथ सोमबार प्रहरी चौकी औरहीबाट खटिएको प्रहरीले शैलेन्द्रलाई पक्राउ गरेको थियो ।

कुटपिटबाट घाइते भएका भालेश्वरको प्रादेशिक अस्पताल हुँदै थप उपचारको लागि नोबेल अस्पताल विराटनगरतर्फ लैजाने क्रममा बाटोमै मृत्यु भएको प्रहरीले जनाएको छ । प्रहरीले शैलेन्द्रलाई पक्राउ गरि आवश्यक अनुसन्धान गरिरहेको छ ।