टिकटकमा लिक भयो ‘ज्वाईसाब’ को क्लाइमेक्स दृश्य

काठमाडौं– असोज २४ गते अर्थात् दसैंको फूलपातीबाट प्रदर्शनमा आउन लागेको फिल्म ‘ज्वाइँ साब’ को एक महत्वपूर्ण दृश्य टिकटकमा सार्वजनिक भएको छ।

काठमाडौँको त्रिभुवन विमानस्थलमा अभिनेता जितु नेपाल बरखी बारेको सेतो पहिरनमा निलो रंगको झोला भिरेर हातमा पासपोर्ट र बच्चा काखी च्यापेको अवस्थामा देखिएका छन् । उनको पछाडि अभिनेत्री नीति शाह नेपालको झन्डा बोकेर भावुक मुद्रामा जितुलाई हेरिरहेकी छन् । यो दृश्य मर्मस्पर्शी देखिन्छ ।

त्रिभुवन विमानस्थलको सो दृश्य फिल्मको ‘क्लाइमेक्स दृश्य’ भएको अनुमान गरिएको छ। सुटिङका क्रममा दर्शकले यो भिडिओ खिचेर टिकटकमा सार्वजनिक गरेका हुन्।

फिल्मको महत्वपूर्ण दृश्य नै टिकटकमा भाइरल भएपछि निर्माण पक्ष तनावमा छन् । यसरी दृश्य रिलिज हुनुले फिल्ममा आर्थिक नोक्सानी समेत हुनसक्ने आँकलन गरिएको छ । वसन्त निरौलाले निर्देशन गरेको ‘ज्वाइँ साब’ जितु र नीतिसहित बुद्धि तामाङ, हिमेश पन्त, रमेश बुढाथोकी, निमा पाण्डे, कविता आले, शिशिर वाङ्देल, दीपक आचार्य, राजकुमार पण्डित, कमलमणि नेपाल, प्रकाश घिमिरे लगायतको अभिनय छ ।