आफ्ना कामको हिसाबकिताब मतदातालाई बुझाउन चितवन जाँदै रवि, पार्टीको झण्डा बोकेर नआउन अनुरोध

काठमाडौं– राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो मतदातालाई आफुले गरेको कामको हिसाबकिताब बुझाउने भएका छन् ।

यसका लागि रवि चितवनको मतदातासँग तेस्रोपटक सार्वजनिक सुनुवाइमार्फत जोडिने भएका छन् । आफूले गरेका हरेक कामको हिसाबकिताब आफ्ना मतदातालाई बुझाउने परम्पराको निरन्तरतास्वतप चितवन जान लागेको उनले बताएका छन् । उनका अनुसार आफ्ना मतदातालाई आफुले गरेको कामकाजको हिसाबकिताब दिन शुक्रबार चितवनको इच्छाकामनास्थित थकाली समाज भवनमा सार्वजनिक सुनवाइ कार्यक्रम हुँदै छ ।

उनले भनेका छन्, ‘सबै मतदातालाई आफ्नो प्रश्न सहित यस कार्यक्रममा उपस्थित हुन अनुरोध गर्दछु। साथै, जनसरोकारको विषयमा गरिएको र राज्यरसमाजका सबै सरोकारवाला सहभागी हुने भएकोले यो कार्यक्रममा पार्टीको झन्डा, ब्यानर, लोगो वा पोसाक नलगाइदिनु हुन अनुरोध छ।’ लामिछाने चितवन २ बाट निर्वाचित सांसद हुन्। २०७९ को प्रतिनिधि सभामा चितवन २ बाट निर्वाचित भएका उनी नागरिकता प्रकरणले सांसद पद गुमेपछि उपनिर्वाचन पनि सोही स्थानबाट सांसद चुनिएका थिए ।