‘दुइचार मान्छे सहकारी ठगीमा जेल पर्नेभए भनेर रुवावासी नगरौं’

काठमाडौं– नेपाली कांग्रेसका महामन्त्री विश्वप्रकाश शर्माले सहकारी ठगीमा केही मान्छे जेल जाँदैमा कसैले पनि रुवाबासी गर्न जरुरी नरहेको बताएका छन् ।

बुधबार ट्विटरमा आफ्नो धारणा सार्वजनिक गर्दै महामन्त्री शर्माले भनेका छन् ‘काँग्रेसका दुइचार, एमालेका दुइचार, माओवादी, राप्रपा र रास्वपाका दुइचार मान्छे सहकारी ठगीमा जेल पर्नेभए भनेर रुवावासी नगरौं । अनुसन्धानलाई सघाऔं, अदालतको फैसला कुरौं । सडक विलापको जगहँसाई नगरौं’ ।

उनले रास्वपाका सभापति रवि लामिछाने सहकारी काण्डमा मुछिएर पक्राउ परेपछि रास्वपाले गरेको विरोधप्रति असहमति जनाएका छन् । उनले भनेका छन् ‘स्पष्ट हौं दोषीलाई कार्वाही र बचतकर्ताको रकम फिर्ता, आजको राष्ट्रिय आवश्यकता हो’ ।

आफ्नै दलका सांसद संलग्न भएर तयार पारेको प्रतिवेदनपछि रवि लामिछाने पक्राउ पर्दा राजनैतिक प्रतिशोध भन्नू संसदीय समिति र संसदकै अपमान भएको उनको भनाइ छ । ‘रास्वपाकै प्रतिनिधिले पनि हस्ताक्षर गरेको प्रतिवेदन भन्छ–प्रचलित कानुन बमोजिम कार्वाही गर्नु । तर प्रक्रिया शुरु भएपछि राजनैतिक प्रतिशोध भन्नू संसदीय समिति र संसदकै अपमान होइन र ?’ उनले भनेका छन् ।

प्रदर्शनले न्यायालय प्रभावित गर्ने प्रयास गरेको शर्माको जिकिर छ । ‘भ्रमको प्रयास वैकल्पिक राजनीति? कि विधि उपर समेतको ठगी’ उनले भनेका छन् । गत शुक्रबार रास्वपा सभापति रवि लामिछाने पक्राउ परेपछि रास्वपाले राजनीतिक प्रतिशोध भन्दै शनिबारदेखि पोखरामा विरोध प्रदर्शन गर्दै आएको छ ।