सिनेमा हलमा एमआरपी भन्दा बढी मुल्यमा खानेकुरा बिक्री गर्न नपाइने
काठमाडौं– हलमा फिल्म हेर्न जाँदा टिकटभन्दा धेरै खानेकुरामा पैसा खर्च हुने समस्याबाट दर्शकहरुले छुटकारा पाउने भएका छन् । बाहिरभन्दा हलभित्रको खानेकुरा तीन गुणासम्म महँगो शुल्कमा किन्न दर्शकहरु बाध्य थिए ।
अब भने सिनेमा हलभित्र पानी र खानेकुरा अधिकतम खुद्रा बिक्री मूल्य (एमआरपी)भन्दा बढीमा बिक्री गर्न नपाइने भएको छ । वाणिज्य, आपूर्ति तथा उपभोक्ता संरक्षण विभागले विज्ञप्ति जारी गर्दै हलभित्र खानेकुराहरुको एमआरपीभन्दा बढी मूल्य लिएको पाइए कानुन अनुसार कारवाही गर्ने चेतावनी दिएको छ ।
सोमबार विभाग र प्रदर्शक संस्था नेपाल चलचित्र संघबीच यसबारे छलफल र अन्तरक्रिया भएको जनाइएको छ । ‘बजारलाई स्वच्छ र प्रतिस्पर्धी बनाउने, उपभोक्ताको हक अधिकार संरक्षण गर्ने सवालको सिलसिलामा उक्त छलफल भएको हो’ छलफलपछि विभागले जारी गरेको विज्ञप्तिमा भनिएको छ ।
चाडपर्व लक्षित बजार अनुगमनलाई तीव्रता प्रदान गरी बजार अनुगमन टोली परिचालन गरिएको समेत विज्ञप्तिमा जनाइएको छ ।