लक्ष्मीपूजाको दिन फिल्म ‘महापुरुष’ युट्युवमा रिलिज हुने
काठमाडौं– फिल्म ‘महापुरुष’ अब युट्युवमा रिलिज हुने भएको छ । लक्ष्मीपूजाको अवसरमा १५ कात्तिकमा यो फिल्म युट्युबमा स्ट्रिमिङ हुन लागेको हो । हलमा व्यापारिक सफलतापछि लक्ष्मीपूजाको अवसर पारेर फिल्म केन्द्र मोसन पिक्चर्सको युट्युव च्यानलमा राख्न लागिएको निर्माता कम्पनी षट्कोण आर्ट्सले जनाएको छ ।
यो फिल्म यसअघि ओटीटी प्लाटफर्ममा समेत आइसकेको छ । सिनेमाघर, एमएसएम भिडिओ जस्ता ओटीटीमा यो फिल्म प्रदर्शनमा आएको थियो । अब भने दर्शकले युट्युबमा निःशुल्क रुपमा फिल्म हेर्न सक्नेछन् ।
बाबु र सन्तानको सम्बन्धको कथामा आधारित यो फिल्ममा हरिवंश आचार्य, मदनकृष्ण श्रेष्ठ, राजाराम पौडेल, गौरी मल्ल, नरेश पौड्याल, अरुण क्षेत्री, शिखा तामाङ, कोपिला थापा लगायतका कलाकारको अभिनय छ ।