हात भाँच्चिएर उपचारका लागि लगिएकी बालिकाको मृत्यु, चिकित्सक प्रहरीको नियन्त्रणमा

काठमाडौं– डोटीमा उपचारका क्रममा एक बालिकाको मृत्यु भएको छ। बायाँ हात भाँच्चिएर घाइते भएकी बालिकाको राजपुरस्थित सुजङ अस्पतालमा उपचारका क्रममा मृत्यु भएको हो ।

दिपायल सिलगढी नगरपालिका–३, दिपायलकी ९ वर्षीया रजनी भुलको उपचारको क्रममा बुधबार राति करिब ८ बजे शल्यक्रिया गर्नका लागि सुइमार्फत एनेस्थेसिया दिइएको थियो । तर बालिका उक्त सुईपछि होसमा आइनन् । बेहोस पार्ने क्रममा दिइएको औषधिको असरले मृत्यु भएको हुन सक्ने अनुमान गरिएको जिल्ला प्रहरी कार्यालय, डोटीका प्रमुख एसपी विनोद शर्माले जनाएका छन् ।

उता बालिकाको होश नआएपछि स्थानीय बासिन्दा र मृतकका आफन्तले चिकित्सकले लापरबाही गरेर उपचार गरेको भन्दै अस्पतालमा तोडफोड मच्चाएका थिए । सोपछि प्रहरीले उपचारमा संलग्न तीन जना चिकित्सकलाई नियन्त्रणमा लिएको छ ।प्रहरीले चिकित्सकहरु डा. राजमणि यादव, डा. सुरेन्द्रकुमार चौधरी र डा. अभिषेक यादवलाई नियन्त्रणमा लिएको हो । अस्पतालमा थप क्षति हुन नदिन तथा घटनाको अनुसन्धानका लागि प्रहरीले उपचारमा संलग्न चिकित्सकलाई नियन्त्रणमा लिएको जनाएको छ । उपचारमा संलग्न चिकित्सकको मेडिकल चेकजाँच गर्दा कुनै समस्या नदेखिएको प्रहरीले जनाएको छ ।

उता आफन्तले भने चिकित्सकको लापबाहीका कारण बालिकाको मृत्यु भएको भन्दै अस्पतालबाट शब उठाउन मानेका छैनन् ।