काठमाडौं– अमेरिकाको आगामी राष्ट्रपति पदमा रिपब्लिकन पार्टीका डोनाल्ड ट्रम्पले जीत निकालेसँगै अमेरिकामा गुगल सर्चमा अनौठो ट्रेण्ड देखिएको छ । ट्रम्पको जीतसँगै अमेरिकाकी नागरिकहरुमा अमेरिका छाडेर कसरी क्यानडामा सर्ने भन्दै गुगल सर्च गर्नेको क्रम ह्वात्तै बढेको हो ।
ट्रम्पको जितसँगै अमेरिकामा गुगल सर्च प्रयोगकर्तामाझ क्यानडा कसरी बसाइँ सर्ने? अर्थात् ‘हाउ टु मुभ टु क्यानडा’ भन्ने प्रश्नको जवाफ गुगल सर्चमा खोज्नेको संख्या ह्वात्तै बढेको न्युजविकको रिपोर्टले देखाएको छ । ्
अमेरिकामा राष्ट्रपति चुनाव भएको रात अमेरिका कसरी छाड्ने भन्ने विषयको गुगल सर्चमा ४०० प्रतिशतले वृद्धि भएको गुगल ट्रेण्डको डेटाले देखाएको छ । त्यसरी गुगल सर्च गर्नेहरुमा राष्ट्रपतिकी उम्मेदवार कमला ह्यारिसलाई सशक्त रुपमा समर्थन गर्ने क्षेत्रका नागरिकहरु सबैभन्दा धेरै रहेको छ । रिपोर्टअनुसार ह्यारिसलाई समर्थन जनाउने ओरेगन, वासिंटनलगायतका राज्यहरुका नागरिकले अमेरिका छाड्ने विषयमा सबैभन्दा धेरै गुगल सर्च गरेको पाइएको हो ।
अमेरिकामा गुगल सर्चको उक्त ट्रेण्डले राष्ट्रपति चुनावको नतिजापछि धेरै अमेरिकीहरुले क्यानडा बसाइँ सर्ने विकल्पका बारेमा सोचिरहेको बुझिएको छ ।
चुनावको क्रममा ट्रम्पले चुनाव जित्ने सुनिश्चित भएसँगै कसरी क्यानडा बसाई सर्ने भन्दै गुगल सर्च गर्ने क्रम तीव्र रुपमा बढेको थियो । यसरी सर्च गर्ने दर ५ सय प्रतिशत सम्मको वृद्धि भएको गुगल ट्रेण्डको तथ्यांकले देखाएको छ।
गुगल सर्चमा मात्र होइन अमेरिकाबाट क्यानडा बसाइँ सर्न थालेको भन्ने बारेका विभिन्न सोसल मिडिया पोस्ट गर्नेहरुको संख्या पनि पछिल्लो समयमा बढेको छ ।
कतिपय सोसल मिडिया पोस्टमा त क्यानडामा बसाइँ सर्नका लागि अमेरिकी नागरिकले अबलम्बन गर्नुपर्ने प्रक्रियाका बारेमा जानकारी समेत गराइएको छ ।
यसअघि सन् २०१६ मा डोनाल्ड ट्रम्पले पहिलोपटक अमेरिकी राष्ट्रपतिको चुनाव जितेपछि पनि धेरै अमेरिकी नागरिकले अमेरिका छाडेका थिए । त्यसबेला अमेरिका छाड्ने अत्यधिक प्रयोगकर्ताका कारण क्यानडाको अध्यागमनको वेबसाइट नै क्रास भएको थियो ।
प्रतिक्रिया