चाबहिलमा इन्टेरियर गोदाममा आगो लाग्दा लाखौँको क्षति
काठमाडौं– काठमाडौंको चाबहिलमा रहेको एक इन्टेरियर गोदाममा आइतबार दिउँसो आगलागी भएको छ । आइतबार मध्यान्ह चाबहिलको सरस्वतीनगरस्थित इन्टेरियर गोदाममा आगो लाग्दा लाखौँ बराबरको धनजनको क्षति भएको छ ।
आगोले गोदाममा रहेको फर्निचर, सजावटका सामाग्री, विद्युतीय सामाग्री, प्लाई लगायतका सामाग्री जलेर नष्ट भएको छ भने आगलागीले वरपरका अन्य घरहरुमा समेत केहि क्षति पुर्याएको छ ।
आगलागी भएपछि सेना, प्रहरी, सशस्त्र प्रहरी लगाएत उपत्यकाका तीनै जिल्लाका बारुणयन्त्रको सहायताले करिव दुई घण्टापछि नियन्त्रणमा लिएको थियो ।
आगालागीका समयमा गोदाममा कोही कामदार नभएकाले के कारणले आगो लाग्यो भन्ने हालसम्म खुलेको छैन । आगलागीका कारण ठूलो क्षति भएको तर क्षतिको यकिन विवरण आउन बाँकी रहेको प्रहरीले जनाएको छ ।