बागलुङको जैमिनीमा पिकअप भ्यान दुर्घटना हुँदा पाँच जनाको मृत्यु (अपडेट)

बागलुङ– बागलुङको जैमिनी नगरपालिकामा पिकअप भ्यान दुर्घटना भएको छ। उक्त दुर्घटनामा परेर चालकसहित ५ जनाको मृत्यु भएको छ ।

जैमिनी नगरपालिका–८ छिस्तीबाट बागलुङ बजार जाँदै गरेको ग २ च ९२४७ नम्बरको ‘पिकअपभ्यान’ जैदीको व्यार्थला नजिकै सोमबार बिहान दुर्घटनामा परेको हो । भ्यानमा चालकसहित ६ जना सवार रहेको जिल्ला प्रहरी कार्यालय बागलुङले जनाएको छ । मृत्यु हुनेहरुमा जैमिनी–८ केवई बस्ने जिप चालक ३८ वर्षीय महेन्द्र पुन, सोही ठाउँ बस्नेहरु २० वर्षीय रश्मी श्रीष, ५० वर्षीय नन्दकली पुन, १७ वर्षीय निरज श्रीष र ७५ वर्षीय कुल प्रसाद श्रीष रहेका छन् ।

गाडीमा सवारमध्ये एक जनाको भने जीवित उद्धार गरिएको प्रहरीले जनाएको छ । जैमिनी ८ केवई बस्ने ४५ वर्षीय गंगाबहादुर श्रीष घाइते रहेको र उनको धौलागिरी अस्पतालमा उपचार भइरहेको छ ।

उक्त भ्यान सडकदेखि ४ सय मिटरभन्दा तल खसेको जिल्ला प्रहरी कार्यालयका प्रहरी निरीक्षक एवं सूचना अधिकारी केशव थापाले जानकारी दिए ।