मकवानपुरका प्रधानाध्यापकमाथी सिन्धुलीमा गोली प्रहार

काठमाडौं– मकवानपुरको एक विद्यालयका प्रधानाध्यापकमाथी सर्लाही–सिन्धुली जिल्लाको सिमा क्षेत्रमा गोली प्रहार भएको छ । सिन्धुलीको हरिहरपुर गाउँपालिका–१ स्थित वापसी खोलामा अज्ञात समूहले आइतबार गोली प्रहार गरेको हो ।

गोली लागेर मकवानपुरको बाग्मती गाउँपालिका–१ बोटगाउँका ४० वर्षीय प्रेमबहादुर बम्जन घाइते भएका हुन् । उनको गालामा गोली लागेको छ ।

गोली प्रहारबाट घाइते भएका उनी मकवानपुरको बकैया गाउँपालिकास्थित बुद्ध माविका प्रधानाध्यापक हुन् । उनी भिनाजु ज्ञानबहादुर लामाको घरमा पुजा मनाएर घर फर्किरहेका थिए । प्र २–०३–००६ प ८५५४ नम्बरको मोटरसाइकल चढेर उनी रौतहट, सर्लाही, सिन्धुली सिमा हुँदै घर फर्कदै गर्दा उनीमाथी अज्ञात समुहले गोली प्रहार गरेका हुन् ।

पेस्तोल बोकेको तीन जनाको अज्ञात समुहले वापसी खोल्सी भन्ने स्थानमा मोटरसाइकल रोकेर साइड लगाउन भनेका थिए । आफूहरुसँग भएको नगद र समान माग्दै गोली प्रहार गरेको घाइते बम्जनका भाइ दिलबहादुर बम्जनले बताएका छन् । उनीपनि बाइकमा सँगै घर फर्किरहेका थिए । पहिलो गोली दाजुलाई लागेको र दोस्रो गोली आफूमाथी हान्दा नपड्कीएपछि अज्ञात समुहका मानिसहरु भागेको उनले बताएका छन् ।

घाइते प्रेमबहादुरको उपचारका लागि पर्साको वीरगञ्जमा रहेको वयोधा अस्पताल लगिएको छ । सर्लाहीको कर्मैयामा रहेको मोडेल अस्पतालमा सामान्य उपचारपछि थप उपचारका लागि उनलाई वयोधा अस्पताल लगिएको हो । गोली प्रहार गर्ने व्यक्तिहरुको खोजी कार्य भइरहेको प्रहरीले जनाएको छ।