सस्तो मूल्यमा ल्यापटप उपलब्ध गराउने भन्दै २७ लाख ठगी गर्ने पक्राउ
काठमाडौं– अनलाइनमार्फत सस्तो मूल्यमा ल्यापटप उपलब्ध गराइदिने भन्दै ठगी गरेको आरोपमा प्रहरीले एक जनालाई पक्राउ गरेको छ ।
कास्कीको माछापुच्छ्रे गाउँपालिका–५ घर भएका २९ वर्षीय सुजन पौडेललाई प्रहरीले पक्राउ गरेको हो । उनलाई काठमाडौं उपत्यका अपराध अनुसन्धान कार्यालय टेकुको टोलीले काठमाडौंको ठमेल नर्सिङचोकबाट पक्राउ गरेको हो ।
पक्राउ परेका पौडेलसहितका व्यक्तिले अनलाइनमार्फत सस्तो मूल्यमा ल्यापटप उपलब्ध गराइदिने भन्दै पीडितहरूसँग रकम अशुल गरेको पाइएको काठमाडौं उपत्यका अपराध अनुसन्धान कार्यालयका एसपी अंगुर जिसीले बताएका छन् ।
उनीहरूले ४० थान ल्यापटप बराबरको २७ लाख ६० हजार रुपैयाँ लिएको तर ल्यापटप नदिइ ठगी गरेको भन्दै उजुरी परेको थियो ।