विद्यालयनजिकै सडेगलेको अवस्थामा पुरुषको शव फेला

काठमाडौं– कैलालीको धनगढी उपमहानगरपालिका वडा नम्बर ११ घोडसुवामा एक पुरुषको शव फेला परेको छ ।

सोमबार बिहान घोडसुवास्थित ठेकराज माध्यमिक विद्यालयको शौचालय नजिक अन्दाजी ६० वर्षीय पुरुषको शव सलेगडेको अवस्थामा फेला परेको हो । ्शवलाई सेती प्रादेशिक अस्पतालको शव गृहमा राखिएको छ । मृत भेटिएका व्यक्तिका आफन्तलाई सनाखतका लागि आउन जिल्ला प्रहरी कार्यालय कैलालीले आग्रहसमेत गरेको छ ।

शव भेटिएको व्यक्ति गहुँगोरो वर्ण, उचाइ ५ फिट ५ इन्च, माथिल्लो शरीरमा सेतो धर्के आस्कोट, भित्र सर्ट, तल्लो शरीरमा हाफ पाइन्ट र दाह्री फुलेको रहेको छ । मृतक शव नजिकै ढाका टोपी, घगारुको लाठी र च्यादर फेला परेको भन्दै प्रहरीले मृतक लाठी टेक्ने र टोपी लगाउने मानिस हुन सक्ने जनाएको छ ।