हिरासतमा भेट्न पुगेका उपसभापतिलाई रविले भने, ‘यो राजनीतिक प्रतिशोध हो भन्ने कुरा नागरिकलाई बुझाउनुस्

काठमाडौं– राष्ट्रिय स्वतन्त्र पार्टी (रास्वपा) का उपसभापतीसहित शीर्ष नेताहरुले जिल्ला प्रहरी कार्यालय कास्कीको हिरासतमा रहेका सभापति रवि लामिछानेसँग भेट गरेका छन् । रास्वपाका उपसभापतिद्वय स्वर्णिम वाग्ले, डीपी अर्यालसहित प्रवक्ता मनिष झाले लामिछानेलाई हिरासतमा पुगेर भेटेका हुन् ।

छलफलमा पुगेका रास्वपा उपसभापति स्वर्णीम वाग्लले रविलाई भेटेर फर्किएपछि सरकारले प्रतिशोध साध्न नै सभापति लामिछानेलाई अनावश्यक हिरासतमा राखेको बताए । े आफूहरुले न्यायिक अनुसन्धानको विरोध नगरेको समेत दावी उनले गरे ।

उपसभामुख वाग्लेले भने, ‘हाम्रो विधिको शासनमा आस्था पनि छ । अति नै भयो । रविजी र रास्वपाप्रति सहानुभूति बढेको छ । अहिले सरकारले राजनीतिक प्रतिशोध राखेको हो । हाम्रो आन्दोलन जारी नै छ ।’ रास्वपाको आन्दोलनलाई ठोस योजना बनाएर अन्य उस्तै एजेन्डा भएकाहरुसँग मिलेर आन्दोलनलाई थप व्यापक बनाउने उनले बताए ।

यस्तै रास्वपाका अर्का उपसभापति डिपी अर्यालले रास्वपाले गर्नलागेको दोस्रो चरणको आन्दोलनलाई व्यवस्थित मोडालिटी बनाएर जाने योजना रहेको बताए । उनले आइतबार पोखरास्थित रास्वपाको आन्दोलनलाई सम्बोधन गर्दै रवि जहाँ रहेपनि जिवित रहेसम्म रास्वपाको नेतृत्व गर्ने बताएका थियो । उनले सोही कुरालाई दोहोर्याउँदै रवि हिरासतमा भए पनि रास्वपाको सभापति नै रहने कुरालाई स्पष्ट पारे ।

रविले भेटघाटको क्रममा आफूमाथी राजनीतिक प्रतिशोध साँधिएको कुरा नागरिकलाई बुझाउन अनुरोध गरेको उनले बताए । रास्वपा सभापति लामिछानेले भेटघाटमा भनेको कुरा उद्धृत गर्दै उनले भने, ‘अहिले अनुसन्धान प्रक्रिया चलिरहेको छ । हामीले बाहिर बसेर गर्न सकिने विषय हुँदाहुँदै पनि मलाई यति गर्नु भनेको चाहिँ राजनीतिक प्रतिशोध हो । यो राजनीतिक प्रतिशोध हो भन्ने कुरा नागरिकलाई बुझाउन भ्याउनुभएको छ कि छैन, बुझाउनुस् । त्यसमा केन्द्रीय समिति र हाम्रा नेताहरु चुक्नुहुँदैन ।’

यस्तै रास्पपाका प्रवक्ता मनिष झाले लामिछानेसँग भेटघटमा भएको छलफलका विषयमा बुधबार पत्रकार सम्मेलन नै गरेर जानकारी दिने बताएका छन् । उनले भने, ‘अहिलेसम्म राज्यसत्ताले गरेको प्रतिशोध र आगामी कदमबारे जानकारी गराउँछौं । पर्सि अपरान्ह केन्द्रीय कार्यलयमा पत्रकार सम्मेलन हुन्छ ।’

सहकारी ठगी प्रकरणमा कात्तिक २ गते काठमाडौंस्थित रास्वपाको केन्द्रीय पार्टी कार्यालयबाट पक्राउ परेका रास्वपा रवि लामिछानेलाई सोहि दिन कास्की पुर्याइएको थियो । पहिलोपटक कात्तिक ४ गते जिल्ला अदालत कास्कीले ५ दिन, दोस्रोपटक ७ दिन, तेस्रो पटक १० दिन हुँदै आइतबार थप १३ दिनको म्याद थप गरेको छ । अदालतबाट अनुमति लिएर कास्की प्रहरीले पोखराको सूर्यदर्शन सहकारीको रकम अपचलनको आरोपमा अनुसन्धान गरिरहेको छ ।

यसै क्रममा पोखरामा अनुसन्धान नसकिँदै उनलाई रुपन्देहीको सुप्रिम सहकारीमा भएको अपचलनको अनुसन्धान गर्न प्रहरीले उनलाई रुपन्देही लग्ने तयारी गरेको छ । टवलस्थित सुप्रिम ऋण तथा बचत सहकारी संस्थाको १४ करोड २९ लाख रुपैयाँ रवि तत्कालिन प्रबन्ध निर्देशक रहेको गोर्खा मिडिया नेटवर्क प्रालिमा लगेर खर्च गरेको आरोप छ । सुप्रिम सहकारीबाट एक करोड ९६ लाख रुपैयाँ रवि लामिछानेको नाममा गएको संसदीय छानबिन विशेष समिति र प्रहरीको प्रतिवेदनमा उल्लेख छ। रुपन्देहीमा रविविरुद्ध अनुसन्धान सकिएपछि उनलाई थप अनुसन्धानका लागि पुन कास्की पुर्याउने योजना प्रहरीले बनाएको छ ।

उता रविमाथी हिरासतमा राख्न अदालतले म्याद थप गरिरहँदा रास्वपाले सभापति लामिछानेको पक्राउविरुद्धको आन्दोलनलाई थप व्यापक बनाउने तयारी गरेको छ । रास्वपाले पोखरा र काठमाडौंमा सभापति पक्राउ भएदेखि नै आन्दोलन गर्दै आएको छ । यस आन्दोलनलाई थप शसक्त बनाउँदै दोस्रो चरणको आन्दोलन गर्न शनिवार रास्वपाको केन्द्रीय समितिको बैठक बसेर नै निर्णय भएको छ । मुलुकमा व्याप्त सङ्गठित भ्रष्टाचार र कुशासनविरुद्ध, सहकारी पीडित, लघुवित्त एवं मिटर ब्याज पीडितका समस्या समाधान, प्रवासमा रहेका नेपाली युवाहरूको मुलुक निर्माणमा सहभागिता र प्रवासका समस्या समाधानका लागि दोस्रो चरणको सशक्त आन्दोलन गर्ने रास्वपाले जनाएको छ ।