डोरीले खुट्टा बाँधि मुखमा कपडा कोचेर ९४ वर्षीया वृद्धाको हत्या

भक्तपुर– भक्तपुरमा एक वृद्धाको हत्या भएको छ । भंक्तपुर नगरपालिका–३ स्थित नासमनामा ९४ वर्षीया विष्णुकुमारी त्वायनाको आफ्नै घरमा हत्या भएको हो । उनको डोरीले खुट्टा बाँधेर मुखमा कपडा कोचेर हत्या भएको अवस्थामा प्रहरीले बुधबार राति फेला पारेको हो ।

ती वृद्धा बिहान तरकारी किनेर घर गएकी थिइन् । उनी दिनभरि पनि घरबाहिर ननिस्केपछि साँझ आफन्तले घरमा हेर्न पुगेका थिए । घरमा मृत अवस्थामा उनी फेला पारेपछि आफन्तले प्रहरीलाई खबर गरेका थिए ।

वृद्धा महिला घरमा एक्लै भएको मौका छोपेर लुटपाट गर्ने उद्देश्यले हत्या भएको हुन सक्ने स्थानीयको अनुमान छ । यद्यपि, प्रहरीले हत्या सम्बन्धी अनुसन्धान अघि बढाएको जनाएको छ । घटना के–कसरी भयो भन्ने विषयमा अनुसन्धान भइरहेको जिल्ला प्रहरी परिसर भक्तपुरका प्रमुख एसपी माधवप्रसाद बुढाथोकीले बताए ।

घटनास्थल भक्तपुर दरवार क्षेत्रको ३ सय मिटर उत्तरमा पर्छ । मृतक विष्णुकुमारीको शवलाई पोष्टमार्टमका लागि दुवाकोटस्थित केएमसी अस्पतालमा राखिएको छ ।