‘ह्रस्व दीर्घ’लाई कस्तो छ दर्शकको साथ ?
आज शुक्रबारदेखि रिलिजमा आएको फिल्म ‘ह्रस्व दीर्घ’ले दर्शकको सुरुवाती साथ उत्साहजनक पाएको छ ।
आज बिहानैबाट फिल्म हेर्नका लागि दर्शकको चाप हलमा उच्च छ । काठमाडौं भित्र र मोफसलका हलहरुमा दर्शकको चाप सुखद देखिदा निर्माणपक्ष उत्साहित देखिएको छ ।
दर्शकले फिल्मलाई मिश्रित प्रतिक्रिया दिएका छन् । फिल्म हेर्न हलमा पुगेका दर्शकले यसको क्लाइमेक्स, मेकिङ, एक्सनलाई प्रशंसा गरेका छन् । फिल्मको क्लाइमेक्सको दृश्यले रुवाएको उनीहरुको भनाई छ ।
फिल्मको मेकिङमा यसकी निर्मात्री नीता ढुंगानाले कञ्जुस्याँई गरेकी छैनन् । दर्शकको उत्साहजनक प्रतिक्रिया पाएपछि नीता खुशी देखिइन् । उनले, मुख्यतया दर्शकको प्रतिक्रिया कस्तो आउँछ भन्ने आफूलाई लागेपनि अहिले निकै खुशी भएको बताइन् ।
यो फिल्मले पाएका अधिकांश शोजमा दर्शकको अकुपेन्सी उच्च छ । भोलि शनिबारको बुकिङ पनि राम्रो देखिएको छ । यसैले, इनिसियल रुपमा फिल्मको व्यापार सुखद हुने देखिन्छ ।
चन्द्र पन्तको निर्देशनमा तयार भएको फिल्ममा नीता ढुंगाना, हरिहर अधिकारी, प्रदिप राउत, ब्रम्हानन्दम, सरोज खनाल, विपना थापा, संचिता लुइटेल, सुनिल वर्मा, गरिमा शर्मा, रेखा थापा, प्रशान्त ताम्राकार लगायतका कलाकारहरुको अभिनय छ । ६ करोडको बजेटमा बनेको यो फिल्मले लगानी उठाउन मात्र नेपाली बक्स अफिसमा १४ करोडको व्यापार गर्नुपर्ने हुन्छ ।